Görünməmiş təhlükəsizlik tədbirləri: Bir oyuna 7,5 min polis nəzarət edəcək

İngiltərə və Meksika arasında keçiriləcək 2026-cı il Dünya Kubokunun 1/8 final mərhələsi matçından əvvəl Mexiko şəhərində İngiltərənin oyunları üçün indiyə qədər ən böyük təhlükəsizlik əməliyyatına başlanacaq.

Paraqraf.com “The Telegraph”a istinadən xəbər verir ki, polis oyunun keçiriləcəyi “Azteca” stadionunu qorumaq üçün 7500 polis əməkdaşı yerləşdirəcək və beləliklə, hər on azarkeşə bir polis əməkdaşı düşəcək.

Mexiko şəhər hakimiyyəti bu tədbirləri ötən həftə Ekvador üzərində qələbənin qeyd edilməsi zamanı baş verən izdihamda dörd nəfərin ölümündən sonra planlaşdırıb. Azarkeşlərə oyunun başlamasından bir neçə saat əvvəl gəlmələri barədə xəbərdarlıq edilib. Həmçinin onlara oyundan sonra meksikalıların ənənəvi olaraq futbol qələbələrini qeyd etmək üçün toplaşdıqları şəhər ərazisindən çəkinmələri tövsiyə olunur.

“The Telegraph” qeyd edir ki, bir çox İngiltərə azarkeşi şəhərdə gəzərkən milli komanda formalarını geyinməməyi seçib. Nəşrin yazdığına görə, bir neçə radikal qrup əvvəlcədən Britaniyanın “müstəmləkə keçmişi” və Qəzza zolağına münasibətinə görə qisas almaq məqsədilə Britaniya azarkeşlərini pusquya salmaqla hədələyib. Bundan əlavə, polis oyuna daxili tələbat pik həddə çatdığı üçün bileti olmayan meksikalı azarkeşlərin stadiona hücum edəcəyindən qorxur.

Paraqraf.com