Çin-Yaponiya münasibətlərində gərginlik yenidən artıb. Çin sahil mühafizəsinə məxsus gəmilərin Şərqi Çin dənizindəki mübahisəli Senkaku (Diaoyu) arxipelaqı yaxınlığında Yaponiya ərazi sularını pozduğu bildirilib.
Paraqraf.com-un dövlət televiziyası NHK-nin Okinava prefekturasındakı 11-ci Region Sahil Mühafizəsi Komandanlığının açıqlamasına istinadən məlumatına görə, Çinə məxsus iki sahil mühafizə gəmisinin Yaponiyanın nəzarətində olan Taişoo adası ətrafında dövrə vurduğu müşahidə edilib. “Müxtəlif silahlarla” təchiz olunduğu görünən gəmilərin Yaponiya Sahil Mühafizəsinin (JCG) xəbərdarlıqlarından sonra ərazidən uzaqlaşdığı qeyd olunub.
Rəsmi məlumata əsasən, JCG bölgəni xarici gəmilərin mümkün ərazi suyu pozuntularına qarşı izləməkdə davam edir.
Hadisə, Yaponiyanın baş naziri Takaichi Sanae-nin Tayvanla bağlı açıqlamalarının Pekin tərəfindən sərt şəkildə tənqid edildiyi və iki ölkə arasında siyasi gərginliyin yüksəldiyi bir dövrə təsadüf edir.
Kəmalə Vəliyeva
Paraqraf.com
