Fidan Hacıyevanın 50 illiyi 3 aylıq Opera Festivalı ilə qeyd olunacaq – VİDEO
Azərbaycan Respublikasının Xalq artisti, yarıməsrlik sənətkar ömrünün “Karmen”i, görkəmli opera sənətçisi Fidan Hacıyevanın 50 illik ömrünün və 30 illik sənət fəaliyyətinin yubileyi münasibətilə Azərbaycan opera tarixində ilk dəfə böyükmiqyaslı Opera Festivalına start verilir.
Paraqraf.com xəbər verir ki, sentyabrın 7-də başlayacaq və 3 ay davam edəcək bu möhtəşəm festival Xalq artisti, maestro Yalçın Adıgözəlovun rəhbərliyi, Xalq artisti Fidan Hacıyevanın iştirakı və Niyazi adına Dövlət Simfonik Orkestrinin müşayiəti ilə baş tutacaq. Bu tarixi sənət hadisəsi tək paytaxtla məhdudlaşmayacaq, ölkəmizin müxtəlif bölgələrini və bir sıra dünya ölkələrini əhatə edəcək. Festival müddətində təqdim olunacaq silsilə konsert proqramları ölkə sərhədlərini aşaraq Azərbaycan opera sənətinin zənginliyini nümayiş etdirəcək və sənətsevərlərin qəlbini fəth edəcək.
Bu möhtəşəm sənət proqramı çərçivəsində həmçinin istedadlı ifaçılara dəstək məqsədilə “Gənclərin səsi – gənclərə dəstək” adlı xüsusi konsert layihəsi də həyata keçiriləcək. Layihə gənc ifaçıların öz istedadlarını nümayiş etdirmələrinə, peşəkar səhnə təcrübəsi qazanmalarına və yaradıcılıq potensiallarını daha geniş auditoriyaya təqdim etmələrinə şərait yaradacaq.
Qeyd edək ki, üç ay davam edəcək Opera Festivalının möhtəşəm bağlanış mərasimi dekabrın 7-də Heydər Əliyev Sarayında Xalq artisti, maestro Yalçın Adıgözəlovun rəhbərliyi və Niyazi adına Dövlət Simfonik Orkestrinin müşayiəti ilə keçiriləcək. Gecədə Azərbaycan Respublikasının Xalq artisti Fidan Hacıyeva İspaniyanın məşhur Flamenko Simfonik Orkestrinin müşayiəti ilə çıxış edəcək.
Bu festival yalnız bir sənətkarın yubileyinə həsr olunmuş tədbirlər silsiləsi deyil, həm də Azərbaycan opera sənətinin və musiqi mədəniyyətinin beynəlxalq səviyyədə təbliği, ölkəmizin zəngin sənət irsinin dünyaya təqdim olunması və gənc istedadlara dəstək baxımından əlamətdar sənət hadisəsi olacaq.
https://youtu.be/uCM9ecGmNKI?si=LA1qY5dQXoUe5vbe
