Gələcəkdə buraxılış imtahanlarında xarici dil üzrə danışıq bacarığının da yoxlanılması tətbiq oluna bilər.
Bu barədə Dövlət İmtahan Mərkəzinin sədri Məleykə Abbaszadə APA-ya müsahibəsində məlumat verib.
Sədr bildirib ki, növbəti ildən XI sinif buraxılış imtahanında şagirdlərin xarici dil fənni üzrə təxminən 100 sözdən ibarət kiçik həcmli yazı yazması nəzərdə tutulur. Onun sözlərinə görə, bu tapşırıq imtahan müddətinə əlavə olaraq təxminən 15 dəqiqə vaxt artırılmasını tələb edə bilər. Hazırda məsələ müzakirə mərhələsindədir və normativ-hüquqi sənədlərə uyğunlaşdırılması istiqamətində iş aparılır.
Təhsil eksperti Ramin Nurəliyev “Paraqraf.com”a açıqlamasında bildirib ki, xarici dil fənni üzrə əlavə vaxtın ayrılması müsbət addımdır:
“Əvvəlki illərdə qəbul imtahanlarında əsas diqqət qrammatikaya yönəlirdi. Abituriyentlər qrammatikanı əzbərləyərək yüksək nəticə əldə etsələr də, danışıq bacarıqları zəif olurdu. Tədrisi ingilis dilində aparılan ixtisaslara qəbul olduqdan sonra isə tələbələr müəyyən çətinliklərlə qarşılaşırdılar. Yeni dəyişikliklər şagirdlərin həm yazı, həm də danışıq bacarıqlarının inkişafına müsbət təsir göstərəcək. Çünki imtahanlarda bu tip tapşırıqların olması onları həmin istiqamətdə çalışmağa təşviq edir”.
Ekspert əlavə edib ki, tətbiq ediləcək yeniliklər gələcəkdə şagirdlərin IELTS kimi beynəlxalq imtahanlarda daha uğurlu nəticə göstərməsinə də kömək edə bilər:
“Əvvəllər qrammatikadan yüksək bal toplayan bəzi abituriyentlər xarici vətəndaşlarla sərbəst ünsiyyət qura bilmirdilər. Danışıq və yazı bacarıqları zəif idi. Yeni qaydalar isə bu istiqamətdə inkişafı stimullaşdıracaq və tədrisi ingilis dilində olan ixtisaslarda təhsilin keyfiyyətinə də müsbət təsir göstərəcək”.
Kəmalə Vəliyeva
Paraqraf.com
