Ukrayna “ən ağır qış”dan sonra cəbhə xəttində vəziyyəti sabitləşdirə bilib və Avropa İttifaqının (Aİ) Rusiyaya qarşı sanksiya təzyiqinin gücləndiriləcəyinə, eləcə də Avropaya inteqrasiya üzrə danışıqların ilk klasterinin açılacağına ümid edir.
Paraqraf.com xəbər verir ki, bunu Ukraynanın xarici işlər naziri Andrey Sibiqa Brüsseldə Aİ Xarici İşlər Şurasının iclasından əvvəl bildirib.
“Ukrayna ən ağır qışdan sonra daha da güclənib. Biz bu qışı, əlbəttə ki, beynəlxalq tərəfdaşlarımızın köməyi ilə geridə qoya bildik. Cəbhədə vəziyyəti sabitləşdirdik”, – Sibiqa jurnalistlərə deyib.
Onun sözlərinə görə, Ukraynanın hava hücumundan müdafiə qüvvələri hazırda Rusiyanın Ukraynaya hücum etdiyi hava obyektlərini, o cümlədən dronların 90%-ni vurmağa qadirdir.
Nazir, həmçinin bildirib ki, Kiyev “çox effektiv xüsusi uzaqmənzilli sanksiyalar” həyata keçirir və bunlar “işə yarayır”. O qeyd edib ki, Ukrayna tərəfi Rusiyada, özü də təkcə iqtisadiyyatda deyil, “maraqlı proseslər”i qeydə alır və bunu Moskvaya təzyiqlərin davam etdirilməsi üçün siqnal hesab edir.
“Məhz buna görə mən buradayam – həmkarlarımla yeni sanksiya paketlərini müzakirə etmək üçün”, – Ukrayna XİN rəhbəri vurğulayıb.
Sibiqa bildirib ki, Brüsseldəki görüşlərdə sülh səylərini və Ukrayna ətrafındakı diplomatik prosesdə Avropanın mümkün yeni rolunu müzakirə etmək niyyətindədir.
“Bizim ABŞ-nin liderliyi altında əsas danışıqlar trekimiz var və bu liderliyə ehtiyacımız var. Lakin Avropa da yeni rol oynaya bilər”, – o bildirib və əlavə edib ki, söhbət “alternativ deyil, tamamlayıcı diplomatik trekdən” gedir.
Nazir, həmçinin bildirib ki, Macarıstandakı seçkilərdən sonra Kiyev Budapeştlə münasibətlərdə yeni dinamikaya və Ukraynanın Aİ-yə daxil olması ilə bağlı danışıqların irəliləməsinə ümid edir.
Sibiqanın sözlərinə görə, Aİ Ukraynanın makromaliyyə sabitliyi və müdafiə imkanlarının gücləndirilməsi, o cümlədən dron istehsalı və növbəti qışa hazırlıq üçün kritik əhəmiyyət kəsb edən 90 milyard avroluq krediti blokdan çıxarıb.
Paraqraf.com
