Azərbaycanda turizm sektorunda qiymət artımı həm yerli turistlərin, həm də ölkəyə gələn qonaqların ən çox narazı qaldığı məsələlərdən birinə çevrilib. Xüsusilə hotellərdə gecələmə xərclərinin yüksəlməsi, nəqliyyat xidmətlərinin bahalaşması və restoran qiymətlərinin yüksək olması tez-tez müzakirə olunur. Bəzi hallarda bu artımın mövsümi tələbatla bağlı olduğu bildirilsə də, digər tərəfdən süni qiymət şişirtməsi ilə bağlı iddialar da gündəmdə qalır. Ekspertlər qeyd edirlər ki, bazarda rəqabət mühiti, xidmət keyfiyyəti və dövlət nəzarəti qiymətlərin formalaşmasına birbaşa təsir göstərir.
Turizm eksperti Ceyhun Aşurov “Paraqraf.com” -a açıqlamasında bildirib ki, Azərbaycanda hotel və restoran qiymətləri beynəlxalq bazarla müqayisədə o qədər də yüksək deyil:
“Əsas problem nəqliyyat xərcləridir. Xüsusilə ölkəyə gəlmək üçün təyyarə biletlərinin qiymətləri kifayət qədər bahadır. İnsanlar səyahət planlaşdırarkən ilk növbədə ümumi xərclərə baxırlar. Əgər aviabiletlər daha əlçatan olsa, turistlər seçdikləri istiqamətə daha rahat səfər edə bilərlər. Azərbaycanı Türkiyə və Gürcüstanla müqayisə etdikdə görürük ki, hotel və restoran qiymətləri rəqabətlidir, lakin bunu uçuş xərclərinə aid etmək mümkün deyil. Bahalı biletlər turistlərin ölkəyə gəlməsini çətinləşdirir”.
Ekspert əlavə edib ki, mövsümə uyğun qiymət dəyişiklikləri normal haldır:
“Rəsmi statistikaya görə, ötən illə müqayisədə Azərbaycana gələn turistlərin sayında azalma müşahidə olunub. Bu ilin ilk üç ayında da təxminən 5 faizə qədər enmə qeydə alınıb. Regionda baş verən hadisələr də xarici turist axınına mənfi təsir göstərən amillər sırasındadır”.
Kəmalə Vəliyeva
Paraqraf.com
