Cənubi Koreyada məhkəmə ölkənin keçmiş prezidenti Yun Sok Yola ömürlük azadlıqdan məhrumetmə cəzası verib.
Paraqraf.com xəbər verir ki, qərarın əsas səbəbi 2024-cü ilin dekabrında ölkədə hərbi vəziyyət elan edilməsi ilə bağlı qiyam xarakterli hərəkətlərə rəhbərlik etmək ittihamı olub.
İttiham aktına əsasən, Yun Sok Yol sabiq müdafiə naziri və digər şəxslərlə cinayət əlaqəsinə girib. Onların məqsədi ölkədə konstitusion quruluşu sarsıtmaq üçün kütləvi iğtişaşlar təşkil etmək olub. Bu plan ölkədə müharibə və ya oxşar miqyaslı fövqəladə vəziyyət olmadığı halda qanunsuz şəkildə hərbi vəziyyətin tətbiqi vasitəsilə həyata keçirilməli idi.
“Müttəhim… ömürlük azadlıqdan məhrum edilir”, – deyə məhkəmə qərar verib.
2024-cü il dekabrın 3-də Yun Sok Yol ordu və polis qüvvələrini cəlb edərək hərbi vəziyyətin tətbiqinə təşəbbüs göstərib. Təhlükəsizlik qüvvələri Milli Assambleyanın binasını mühasirəyə alaraq deputatların içəri daxil olmasına mane olublar. İstintaqın müəyyən etdiyi kimi, o, həmçinin parlamentin spikerinin, eləcə də hakim və ən böyük müxalif siyasi qüvvələrin rəhbərlərinin saxlanılması barədə göstəriş verib.
Buna cavab olaraq deputatlar mühasirəni yararaq təcili plenar iclas keçiriblər. İclasda hərbi vəziyyətin ləğvi barədə qərar qəbul olunub. Prezident bu qərarla razılaşıb, daha sonra parlament onun impiçmenti barədə səsvermə keçirib.
Paraqraf.com
