Cenevrədə ABŞ-ın vasitəçiliyi ilə Rusiya və Ukrayna arasında danışıqların növbəti raundu keçirilib. Bu barədə TASS mənbələrə istinadən məlumat yayıb.
Xatırladaq ki, tərəflər arasında əvvəlki görüşlər 23-24 yanvar və 4-5 fevral tarixlərində Əbu-Dabi şəhərində baş tutub.
Siyasi elmlər üzrə fəlsəfə doktoru, politoloq Şəbnəm Həsənova “Paraqraf.com”a açıqlamasında bildirib ki, görüş müharibənin dördüncü ildönümündən bir neçə gün əvvəl keçirilir:
“Əbu-Dabidə keçirilən danışıqlardan sonra Cenevrədə Kiyev, Vaşinqton və Moskva nümayəndələri iki günlük müzakirələr üçün bir araya gəliblər.
Nümayəndə heyətləri təxminən 1250 kilometrlik cəbhə xətti boyunca şiddətli döyüşlərin davam etdiyi, Rusiyanın mülki əraziləri və enerji infrastrukturunu amansızcasına bombaladığı bir vaxtda toplanıb.
Kiyevin fikrincə, Rusiyanın hava hücumlarının tempini və intensivliyini dayandıracağına, yaxud azaldacağına dair heç bir ümid yoxdur. Çünki nümayəndə heyəti Kiyevdən yola düşərkən Prezident Volodimir Zelenski Rusiyanın daha bir böyük zərbə üçün hazırlaşdığı barədə xəbərdarlıq etmişdi.
Zelenski Ukraynanın hərbi hava qüvvələri rəisinə, müdafiə nazirinə və dövlətə məxsus “Ukrenerqo” elektrik şirkətinin rəhbərinə mümkün hücumdan əvvəl gün ərzində əlavə qoruyucu tədbirlər hazırlamağı tapşırıb.
Kreml sözçüsü Dmitriy Peskov Cenevrə danışıqlarının Əbu-Dabidə keçirilən əvvəlki raundlardan daha geniş mövzuları əhatə edəcəyini bildirsə də, nəticə əldə olunmayıb. Xüsusilə nümayəndə heyətləri arasında ən mürəkkəb məsələ – Ukrayna ərazilərinin müzakirəsi ilə bağlı ümidlər sıfıra bərabərdir”.
Politoloq qeyd edib ki, Peskov Putinin köməkçisi Vladimir Medinskinin görüşdə iştirakını vacib sayır:
“Lakin Medinskinin maksimalist ritorikası hamıya məlumdur. Onun danışıqlara geri dönüşü Moskvanın mövqeyinin sərtləşdiyini göstərir. Bu isə Rusiyanın konkret nəticə əldə etmək niyyətində olmadığını və yalnız rəsmi iştirak görüntüsü yaratmaq istədiyini göstərən başqa bir amildir.
Medinski Rusiyanın Ukraynaya qarşı tammiqyaslı işğalının qatı tərəfdarıdır. 2025-ci ilin yanvarında o, Rusiyanın Ukraynaya qarşı müharibəsini Sovet İttifaqının nasist Almaniyasına qarşı mübarizəsinin davamı kimi təqdim edən və bu müharibəni “Qərb təhdidlərinə qarşı zəruri reaksiya” kimi təsvir edən yeni “Rusiyanın hərbi tarixi dərsliyi”nin redaktoru olub. Medinski bildirib ki, Rusiyanın XX əsr boyunca üzləşdiyi fəlakətlər qarşısında “səbrinin” rus xalqının “əlavə bir xromosomu” olduğunu göstərir.
ABŞ tərəfi isə rusiyalı həmkarlarına Medinski kimi sərt xətt tərəfdarlarının sülh prosesində iştirakının məhdudlaşdırılmasını üstün tutduğunu bildirib. Danışıqlar komandası hərbi, siyasi və təhlükəsizlik komponentləri nəzərə alınmaqla formalaşdırılsa da, konkret nəticə əldə olunmayıb.
Ukraynanın Milli Təhlükəsizlik və Müdafiə Şurasının katibi Rüstəm Umerov Kiyevin enerji atəşkəsi məsələsini gündəmə gətirməyi planlaşdırdığını açıqlasa da, Moskva bu ideyanı əvvəllər dəfələrlə rədd edib”.
Politoloq bildirib ki, Tramp Ukraynanın mümkün qədər tez danışıqlar masasına əyləşməsi gərəkdiyini vurğulayıb:
“Rusiya Ukraynadan Moskvanın ələ keçirə bilmədiyi Donetsk vilayətinin qalan 20 faizini geri qaytarmağı tələb etsə də, Kiyev bu təklifdən imtina edir. Zelenski isə qeyd edib ki, Ukrayna heç kimin onu Rusiyanın müharibəni dayandırmaq istəməməkdə ittiham edə bilməməsi üçün əlindən gələni edir.
Bu dəfəki görüşdə Tramp Moskva və Kiyevi 1945-ci ildən bəri Avropanın ən böyük müharibəsinə son qoymaq üçün razılığa gəlməyə çağırsa da, Zelenski ölkəsinin güzəşt etmək üçün artan təzyiqlərlə üzləşdiyini bildirib.
İki böyük qlobal böhranı eyni vaxtda müzakirə etmək üçün nadir cəhd olan Cenevrə görüşü nəticəsiz qaldı, əhəmiyyətli irəliləyiş ümidləri puça çıxdı”.
Kəmalə Vəliyeva
Paraqraf.com
