Son illərdə Ermənistanın xarici siyasətində müşahidə edilən dönüş Moskva–İrəvan münasibətlərinə ciddi təsir göstərib. İrəvanın Qərbə doğru yaxınlaşması və regionda “yeni siyasi reallıqlara uyğun mövqe formalaşdırmaq cəhdi” Rusiyanın narazılığına səbəb olur.
Mövzu ilə bağlı politoloq Tural İrfan Paraqraf.com-a bildirib ki, Ermənistanın prioritetlərinin dəyişməsi artıq açıq şəkildə görünür:
“Ermənistan daha çox Qərbə yön alır və Bakı ilə Ankara ilə münasibətləri Rusiyanın iştirakı olmadan nizamlamaq istəyir. Bu isə Moskvanı ən çox narahat edən məqamlardandır. Ermənistan rəhbərliyinin son açıqlamaları da ölkənin Rusiya orbitindən uzaqlaşmaq niyyətini bir daha nümayiş etdirir. Rusiya uzun illər Ermənistanı öz orbitində saxlayıb və Azərbaycan–Ermənistan arasındakı keçmiş münaqişədə mühüm rol oynayıb. İndi isə Ermənistanın bu orbitdən çıxması Kreml üçün ciddi siqnaldır”.
Tural İrfanın sözlərinə görə, Moskva Ermənistandakı daxili siyasi proseslər üzərində təsir imkanlarını itirmək istəmir:
“Moskva hazırda Ermənistanda kilsə və ona yaxın qruplar vasitəsilə hakimiyyət dəyişikliyinə nail olmağa çalışır. Rusiyaya bağlı fiqurların yenidən önə çəkilməsi Kreml üçün strateji məqsədə çevrilib. Ermənistan isə həm bölgədə, həm də beynəlxalq aləmdə nüfuzunu itirən Rusiya ilə yaxınlığı davam etdirməyin perspektivsiz olduğunu anlayır. Ukrayna müharibəsi Rusiyanın həm regionda, həm də dünyada təsirini ciddi şəkildə zəiflədib. Ermənistan bunu görür və Qərbə yön almağın daha rasional seçim olduğunu düşünür”.
Politoloq hesab edir ki, regionda dəyişən güc balansı İrəvana yeni imkanlar açır:
“Türkiyənin artan rolu, Azərbaycanın sülh təşəbbüslərinin aktuallaşması və Ermənistan üçün yaranan yeni perspektivlər ölkənin Rusiyadan asılılığını azaltmağa şərait yaradır. Ermənistan hazırda ən real inkişaf yolunun hansı olduğunu daha yaxşı dərk edir. Davamlı sülh, iqtisadi sabitlik və təhlükəsizlik üçün Qərblə əməkdaşlıq, eləcə də Azərbaycan və Türkiyə ilə münasibətlərin normallaşması Ermənistana daha real nəticələr verə bilər”.
Cəfərova Validə
Paraqraf.com
