Məqsəd Qubadlını daha da gözəl, müasir və abad bir şəhərə çevirməkdir

1988-ci ildən başlayaraq Еrmənistanla sərhəddə yеrləşən Qubadlı rayonuna təcavüzkar hücumlar başlanmış, dinc əhaliyə qarşı tеrror törədilməsi sistеmli şəkildə davam еtdirilmişdir. 1993-cü il avqustun 31-də rayon ermənilər tərəfindən tamamilə işğal olunmuşdur. Nəticədə minlərlə sakin öz doğma yurd-yuvasından didərgin düşmüşdür.

İşğal nəticəsində rayondan minlərlə məcburi köçkün respublikanın müxtəlif yaşayış məntəqələrində müvəqqəti yerləşdirilmişdir. Yüzlərlə yaşayış məntəqəsi, fərdi yaşayış evləri, inzibati binalar, sosial və mədəniyyət obyektləri, məscidlər, körpülər erməni işğalçıları tərəfindən dağıdılmış və yararsız vəziyyətə salınmışdır. Bundan başqa kənd təsərrüfatı obyeklərinin, avtomobil yollarının, su anbarları və magistral su xətlərinin, eləcə də elektrik xətləri və magistral qaz boru xətlərinin tamamilə dağıdılması ermənilərin təcavüzkar və vandal xarakterli olduğunu bir daha nümayiş etdirmişdir.

Bütün bunlara baxmayaraq, 27 il ərzində Qubadlı sakinləri doğma torpaqlarına qayıtmaq ümidini heç vaxt itirmədilər. Nəhayət, 2020-ci ilin Vətən müharibəsi zamanı bu arzu reallığa çevrildi.

2020-ci ilin 25 oktyabrında Müzəffər Ali Baş Komandan İlham Əliyevin rəhbərliyi ilə Azərbaycan Ordusu Qarabağda parlaq zəfərlər silsiləsini davam etdirərək, Qubadlı şəhərini erməni işğalından azad etmişdir.

Qubadlı əməliyyatı xüsusi peşəkarlıq və fədakarlıq tələb edirdi. Azərbaycan Ordusu bu peşəkarlığı, fədakarlığı göstərərək, şəhəri düşməndən tam təmizlədi. Qubadlının azadlığı Azərbaycanın ərazi bütövlüyünün bərpası yolunda mühüm addımlardan biri idi. Qəhrəman əsgərlərimizin igidliyi, xalqımızın birliyi və dövlətimizin gücü sayəsində Qubadlıda üçrəngli bayrağımız qürurla dalğalanmağa başladı.

Azərbaycan Respublikasının Qubadlı rayonunun işğaldan azad edilməsi uğrunda aparılmış döyüş əməliyyatlarında iştirak edərək şəxsi igidlik və şücaət nümayiş etdirmiş Azərbaycan Respublikası Silahlı Qüvvələrinin 15209 hərbi qulluqçusu “Qubadlının azad olunmasına görə” medalı ilə təltif edilmişdir. Həmçinin, Prezident İlham Əliyevin 31 iyul 2023-cü il tarixli Sərəncamı ilə Azərbaycan Respublikasının işğaldan azad edilmiş əraziləri üzrə şəhər günləri təsis edilməklə, sözügedən Sərəncama əsasən 25 oktyabr – Qubadlı şəhəri günü kimi müəyyən edilmişdir.

Bu gün Qubadlıda yenidənqurma və bərpa işləri geniş vüsət alıb. Yeni infrastruktur layihələr, yollar, məktəblər, xəstəxanalar və müasir yaşayış məhəllələri inşa olunur. Məqsəd, doğma Qubadlını daha da gözəl, müasir və abad bir şəhərə çevirməkdir. 2040-cı ilə qədər şəhərin və rayondaxili infrastrukturun dirçəldilməsi və inkişafı planlanır. Rayonda minalardan təmizləmə işi başlanmışdır. Çünki, infrastrukturu sıfırdan qurmaqdan əvvəl təhlükəsizlik vacibdir.

Perspektivdə rayonda ekoturizm, kənd təsərrüfatı, azaldılmış su itkisi ilə yeni suvarma texnologiyaları kimi sahələrin inkişaf etdirilməsi planlanır. Əhalinin geri qayıdışı, mənzil mövcudluğu, sosial infrastrukturun işə salınması kimi sahələrdə isə zaman tələb olunur.

Bu gün xalqımız qürurla 25 oktyabr tarixini Qubadlı şəhəri günü kimi qeyd edir və bu gün təkcə bir şəhərin azad olunmasının deyil, həm də xalqımızın iradəsinin, vətən sevgisinin və qəhrəmanlığının təntənəsidir. Bütün Qubadlıları və xalqımızı bayram münasibətilə təbrik edirəm!

Allah şəhidlərimizə rəhmət eləsin!