Qiymətli metallar bazarında genişmiqyaslı satışların təsiri ilə qızıl 2013-cü ildən bəri ən kəskin enişini, gümüş isə 2021-ci ildən bu yana ən böyük qiymət itkisini yaşayıb.
Paraqraf.com xəbər verir ki, bir neçə həftə davam edən və qiymətli metalların ardıcıl olaraq rekord səviyyələrə yüksəlməsinə səbəb olan “rallidən” sonra qızılın qiyməti kəskin şəkildə geriləyib.
Dünən qızılın bir unsiyasının qiyməti 4381,52 ABŞ dollarına qədər yüksələrək yeni zirvəyə çatmışdı. Lakin bu gün qlobal birjalarda qızıl 6,3% ucuzlaşaraq son 12 ilin ən böyük geriləməsini qeydə alınıb.
Qiymətlərin düşməsində bir sıra amillər rol oynayıb — Çin və ABŞ arasında aparılan müsbət ticarət danışıqları, dolların möhkəmlənməsi, ABŞ hökumətinin fəaliyyətindəki fasilə səbəbindən investorların mövqelərində yaranan qeyri-müəyyənlik, eləcə də Hindistanda mövsümi qızıl alışı dalğasının başa çatması kimi faktorlar qiymətli metalların dəyərini aşağı salıb.
ABŞ Prezidenti Donald Tramp və Çin Dövlət Başçısı Si Cinpinin gələn həftə ticarət sahəsində fikir ayrılıqlarını aradan qaldırmaq üçün görüşəcəkləri gözlənilir. Bu görüşə dair optimizm “təhlükəsiz liman” kimi qəbul edilən qızıla tələbi azaldıb. Eyni zamanda, ABŞ dollarındakı artım qızılı digər valyutalarla alan investorlar üçün daha baha edib.
Bu il təxminən 80% bahalaşan gümüş də bu gün eniş tendensiyasına qoşulub.
Bakı vaxtı ilə saat 23:25-ə olan məlumata görə, Nyu-York birjasında qızılın unsiyasının qiyməti 6 % azalaraq 4108 dollara, gümüşün qiyməti isə 7,8% düşərək 48,38 dollara ticarət olunub.
