Pul insan həyatında yalnız maddi vasitə deyil, həm də psixoloji və sosial davranışları formalaşdıran mühüm faktorlardan biridir. İnsanların pula münasibəti onların düşüncə tərzi, yetişdiyi mühit və cəmiyyətin verdiyi mesajlardan asılı olaraq dəyişir. Bəziləri pulu uğur və təhlükəsizliyin rəmzi kimi görür, digərləri isə onu mənəvi dəyərlərə zidd bir vasitə kimi qəbul edir. Xüsusilə “Pul əl çirkidir” kimi ifadələr nəsildən-nəslə ötürülərək bir çox insanın şüuraltında yer alıb.
Mövzu ilə bağlı psixoloq Gülnar Orucova “Paraqraf.com”-a açıqlamasında bildirib ki, insanın pula münasibəti onun həyat keyfiyyətinə birbaşa təsir edir:
“Varlı insanlar heç vaxt ‘pul əl çirkidir’ kimi düşünmür. Onlar pulun vacib bir vasitə olduğunu anlayır. Bu ifadə isə illərlə cəmiyyət tərəfindən formalaşdırılmış yanlış bir düşüncə proqramıdır”.
Onun sözlərinə görə, kasıb və varlı düşüncə tərzi bir-birindən kəskin şəkildə fərqlənir:
“Kasıb düşüncəsində tez-tez ‘çox pulu olan insan yaxşı insan deyil’ və ya ‘varlılar qəddardır’ kimi inanclar formalaşır. Bu cür stereotiplər insanları şüuraltı şəkildə puldan uzaqlaşdırır və qazanc imkanlarını məhdudlaşdırır”.
Psixoloq əlavə edib ki, düşüncə dəyişmədikcə insan öz maddi vəziyyətini də dəyişə bilməz:
“İnsanlar anlamalıdır ki, pul sadəcə vasitədir. Əgər düşüncəmizi dəyişsək, ətrafımızdakı imkanları da fərqli şəkildə görməyə başlayarıq. Beynə nə yükləyirsənsə, onu yaşayırsan”.
Ləman
Paraqraf.com
