Mütəxəssis: Menopoz dövründə lobya və soya ürək xəstəlikləri riskini azalda bilər

Menopoz dövründə olan qadınlara lobya və soya məhsullarını daha tez-tez qida rasionuna daxil etmək tövsiyə olunur.

Paraqraf.com xəbər verir ki, amerikalı qidalanma mütəxəssisi Tara Şmidt bildirib ki, bu məhsullar arterial təzyiqin normada saxlanmasına kömək edir və ürək-damar xəstəlikləri riskini azaldır.

Mütəxəssisin sözlərinə görə, lobya və soya məhsulları qida lifləri, antioksidantlar və minerallarla zəngindir. Bu maddələr ürək-damar sisteminin sağlamlığına müsbət təsir göstərir. Xüsusilə menopozdan sonra hormonal dəyişikliklər səbəbindən qadınlarda yüksək qan təzyiqi və digər ürək xəstəliklərinin inkişaf riski artır.

Tara Şmidt lobyanın salatlara, şorbalara və digər yeməklərə müntəzəm əlavə edilməsini tövsiyə edir. Onun izahına görə, liflə zəngin qidaların həzmi zamanı asetat, butirat və propionat kimi qısazəncirli yağ turşuları əmələ gəlir. Bu maddələr qana sorularaq arterial təzyiqin aşağı düşməsinə kömək edə bilər.

Bundan əlavə, lobya və soyanın tərkibində olan kalium orqanizmdən artıq natriumun xaric olunmasını sürətləndirərək qan təzyiqinin tənzimlənməsinə yardım edir. Nəticədə qan damarlarına düşən yük azalır.

Kardioloq Sem Setare də qeyd edib ki, yüksək qan təzyiqi orta və yaşlı qadınlarda ən çox diqqətdən kənarda qalan sağlamlıq problemlərindən biridir. Hipertoniya əksər hallarda simptomsuz keçsə də, infarkt, insult və digər ciddi fəsadların riskini əhəmiyyətli dərəcədə artırır.

Mütəxəssisin sözlərinə görə, menopauza dövründə estrogen və progesteron kimi qadın cinsi hormonlarının səviyyəsinin azalması damar tonusunun tənzimlənməsinə mənfi təsir göstərir və hipertoniya riskini yüksəldir.

Qeyd edək ki, daha əvvəl aparılmış elmi araşdırmalar paxlalı bitkilərin və soya məhsullarının müntəzəm istifadəsinin yüksək qan təzyiqinin yaranma riskini təxminən 30 faiz azalda biləcəyini göstərib.