Azərbaycanın turizm imkanları Çində beynəlxalq tədbir çərçivəsində tanıdılıb

İyunun 3-də Dövlət Turizm Agentliyi yanında Azərbaycan Turizm Bürosu 10 yerli turizm sənayesi nümayəndəsi ilə birlikdə Çin-Azərbaycan Turizm Dialoqu tədbirində iştirak edib.

Paraqraf.com bu barədə agentliyə istinadən xəbər verir.

Məlumata görə, tədbiri Çinin Mədəniyyət və Turizm Nazirliyi, Beynəlxalq Mübadilə və Əməkdaşlıq Bürosu və Ümumdünya Turizm Təşkilatları Alyansı təşkil edib. Dialoqda Azərbaycanın turizm imkanları tanıdılıb.

Tədbirdə hər iki ölkənin dövlət və özəl turizm qurumlarının nümayəndələri, beynəlxalq təşkilatların rəsmiləri və turizm sənayesinin aparıcı ekspertləri iştirak ediblər.

Xatırladaq ki, mayın 29-da Çin turizm sənayesi ilə əməkdaşlığın genişləndirilməsi Azərbaycanın turizm məhsulları və unikal turizm imkanları barədə məlumatlılığın artırılması, eləcə də ölkəmizin Çin bazarında tanıtım fəaliyyətlərinin gücləndirilməsi məqsədilə Pekin şəhərində ATB-nin rəsmi nümayəndəlik ofisinin açılışı baş tutub.

Bu ilin yanvar-aprel aylarında Çindən Azərbaycana səfər edənlərin sayı ötən ilin eyni dövrü ilə müqayisədə 9,5 % artaraq 14 303 nəfər təşkil edib.

 

Paraqraf.com