“Bizim əsas prioritetlərimiz var. Bu prioritetlər də daim xərc siyasətimizdə qorunacaq. Birincisi, ölkəmizin müdafiə qabiliyyəti və təhlükəsizliyinin təmin olunmasıdır – bununla bağlı bütün xərclər hər zaman dövlət büdcəsində qorunacaq”.
Bu fikirləri maliyyə naziri Sahil Babayev AZƏRTAC-a və AzTV-yə məxsusi müsahibəsində səsləndirib.
İqtisadçı-ekspert Natiq Cəfərli “Paraqraf.com”a bildirib ki, dövlət adlanan institutun ilk vəzifəsi ölkənin təhlükəsizliyini təmin etməkdir:
“Azərbaycan elə bir regionda yerləşir ki, coğrafiyası taleyinə çevrilib. Hazırda Ermənistanla sülh prosesi davam edir və bu, sevindirici haldır. Lakin ölkənin şimalında və cənubunda müharibələr gedir, bu isə Azərbaycan üçün daim müəyyən təhlükələr yaradır. Ona görə də təhlükəsizlik və ordu xərcləri hər zaman yüksək səviyyədə olacaq. Bu baxımdan, nazirin fikirləri doğrudur.
Amma bu, digər sahələrə ayrılan vəsaitlərdə ləngimələrin olması anlamına gəlməməlidir. Paralel olaraq sosial məsələlərin həlli və həmin sahələrə vəsait ayrılması ilə bağlı çatışmazlıqlar da aradan qaldırılmalıdır”.
Kəmalə Vəliyeva
Paraqraf.com
