“Sudan İstifadə sahəsində Mütəxəssislər” İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin 2026-cı il üzrə “WUF13 ilə bağlı təşəbbüslər” istiqaməti çərçivəsində həyata keçirdiyi “Müasir şəhərlər və su təsərrüfatı” adlı layihəni “Su və Meliorasiya Elmi-Tədqiqat İnstitutu”nun tərəfdaşlığı ilə uğurla başa çatdırıb.
Layihənin yekun tədbirində əvvəlcə Azərbaycan Respublikasının Dövlət Himni səsləndirilib, vətən uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.
Layihə rəhbəri Pərvanə Xıdırova qonaqları salamlayaraq yerli və xarici iştirakçıları tədbirdə görməkdən məmnunluğunu ifadə edib. O, layihə çərçivəsində keçirilən tədbirlər barədə ətraflı məlumat verib.
Bildirilib ki, layihənin ilk günü Bakı Olimpiya Stadionunda Qeyri-Hökumət Təşkilatlarına Dövlət Dəstəyi Agentliyinin pavilyonunda beynəlxalq ekspertlərin iştirakı ilə panel müzakirəsi keçirilib. Paneldə Beynəlxalq Su İdarəetmə İnstitutunun Özbəkistan üzrə rəhbəri Dr. Barbara Janusz-Pawletta davamlı inkişaf strategiyasında transsərhəd suların idarə olunmasında əməkdaşlığın rolu barədə çıxış edib. Layihələrin idarəedilməsi üzrə rəhbər Alexandr Nikolayenko müasir məskunlaşma şəraitində içməli su və davamlı su idarəetməsində sanitariya dəyişikliklərindən danışıb.
Türkiyənin İstanbul Texnik Universitetinin professoru Bülent İnanç şəhərsalmanın yeni mərhələsində su idarəetməsi, effektivlik və su itkilərinin azaldılması mövzusunda təqdimatla çıxış edib. Polşanın Mickiewicz Universitetinin professoru Dr. Çezary Madry isə Polşada su ehtiyatlarının idarə olunmasında insan coğrafiyasının perspektivindən bəhs edib.
Panelin moderatoru Tural Mustafazadə ekspertlərə mövzu ətrafında suallar ünvanlayıb, iştirakçıların fikirləri dinlənilib və geniş müzakirələr aparılıb.
Layihənin ikinci günündə “Su və Meliorasiya Elmi-Tədqiqat İnstitutu”nun sədr müavini Rəşail İsmayılov xarici ekspertləri salamlayaraq onların layihədə iştirakından məmnunluğunu bildirib və Azərbaycanda su təsərrüfatı sahəsində görülən işlər barədə məlumat verib.
SAİRS-in direktoru Şöhrət Məmmədov “Müasir şəhərlərdə insan və təbiət ahəngi” mövzusunda təqdimatla çıxış edib. Daha sonra Təlim və İnnovasiya Mərkəzinin rəhbəri Bahadur Kəngərlinin müşayiəti ilə yaşıllaşdırılmış ekopark ərazisinə infotur təşkil olunub. İştirakçılar burada tətbiq olunan müasir texnologiyalar və ekoloji yanaşmalarla yaxından tanış olublar.
Ardınca keçirilən panel sessiyasında beynəlxalq ekspertlər su idarəçiliyi, sanitariya dəyişiklikləri, şəhərsalma və su ehtiyatlarının idarə olunması mövzularında fikir mübadiləsi aparıblar. Sessiyanın moderatoru “Su və Meliorasiya Elmi-Tədqiqat İnstitutu”nun Strateji İnkişaf Departamentinin rəhbəri Şəlalə Həsənova olub.
Tədbirdə Azərbaycan Dövlət Neft və Sənaye Universitetinin əcnəbi tələbələri də iştirak ediblər. Bədii hissədə tələbələr birlik və həmrəyliyi əks etdirən rəqs nümunələri təqdim ediblər.
Layihənin üçüncü günündə amerikalı ekspert Alan Mammoser QHT Agentliyinin pavilyonunda “Şəhərlərin planlaşdırılmasında vətəndaşların fəal iştirakı” mövzusunda təqdimat edib.
Daha sonra xarici ekspertlərin iştirakı ilə Ceyranbatan Ultrasüzgəcli Təmizləyici Qurğular Kompleksinə infotur təşkil olunub. Kompleksin rəhbəri Oruc Bayramov qonaqlara müasir su idarəetmə sistemi və həyata keçirilən layihələr barədə ətraflı məlumat verib.
Sonda xarici ekspertlər Təşəkkürnamə ilə təltif olunub, layihə komandasına təşəkkür edilib və xatirə şəkli çəkdirilib.
Paraqraf.com
