Misirin mənzil inşaatı, kommunal xidmətlər və şəhər icmaları naziri Randa Əli Saleh BMT nümayəndələri ilə Bakıda keçiriləcək Ümumdünya Şəhərsalma Forumunun 13-cü sessiyasında (WUF13) iştiraka hazırlığı müzakirə edib.
Paraqraf.com xəbər verir ki, bu barədə nazirliyin “X” sosial şəbəkəsindəki paylaşımında bildirilib.
“Mənzil inşaatı naziri ikitərəfli əməkdaşlığın bir sıra məsələlərini müzakirə etmək üçün BMT-nin Misirdəki daimi əlaqələndiricisi Yelena Panova ilə görüşüb. Tərəflər həmçinin WUF13-də iştiraka hazırlığı müzakirə ediblər”, – məlumatda qeyd olunub.
Qeyd edək ki, WUF13 mayın 17-22-də Bakıda keçiriləcək. Forum Azərbaycanın BMT-nin Məskunlaşma Proqramı (UN-Habitat) ilə sıx əməkdaşlığı çərçivəsində keçirilir və dayanıqlı şəhərsalma, “ağıllı şəhərlər” və innovativ şəhər həlləri sahəsində beynəlxalq təcrübə mübadiləsinə yönəlib.
