Müasir dövrdə qlobal iqtisadi dəyişikliklər və regionda baş verən proseslər ölkələrin iqtisadi siyasətlərini davamlı şəkildə yeniləməyi zəruri edir. Azərbaycan üçün də bu proses istisna deyil. Xüsusilə enerji resurslarından asılılığın azaldılması, qeyri-neft sektorunun inkişafı və rəqabətqabiliyyətli iqtisadi mühitin formalaşdırılması iqtisadi islahatların əsas istiqamətləri kimi çıxış edir. Bu baxımdan, struktur dəyişiklikləri, şəffaf idarəetmə və innovasiyaların təşviqi ölkənin uzunmüddətli iqtisadi sabitliyi üçün mühüm əhəmiyyət daşıyır.
İqtisadçı-ekspert Razi Abbasbəyli “Paraqraf.com”a bildirib ki, iqtisadi dayanıqlığın artırılması üçün ölkədə qeyri-neft sektoruna qoyulan investisiyalar artırılmalıdır:
“Xüsusilə aqrar sektorda yeni strategiya hazırlanmalıdır. Torpaqların təyinatı üzrə əkilib-becərilməsi, ərzaq məhsullarının tədarük proqramlarının genişləndirilməsi və subsidiyaların artırılması vacibdir. Digər tərəfdən, qeyri-neft sektorunun inkişaf etdirilməsi üçün sənaye müəssisələrinin vergi və rüsumlardan azad edilməsi, əlavə inzibati müdaxilələrin minimuma endirilməsi önəmlidir. Bu iqtisadi islahatların həyata keçirilməsi nəticəsində mərhələli şəkildə neft və qaz resurslarından asılılığın azaldılmasına nail olmaq mümkündür.
Azərbaycanın yerləşdiyi coğrafi mövqe logistik baxımdan da əhəmiyyətlidir. Avropa ilə Asiya arasında tranzit rolunu oynamaq potensialına malik olan Azərbaycan üçün bu vacib məqamdır. Son illərdə neft və qaz ixracatının şaxələndirilməsi istiqamətində həyata keçirilən tədbirlər ölkənin qeyri-neft sektorunun inkişafına da töhfə verir”.
O qeyd edib ki, Azərbaycan üçün qeyri-neft sektorunun inkişafında turizmin də rolu böyükdür:
“Ölkənin turizm potensialı əlverişlidir. Turizm sektorunda güzəştlərin ayrılması vacibdir. Son illərdə Azərbaycanda siyasi sabitliyin qorunması, milli valyutanın məzənnəsinin sabit saxlanılması turizmin inkişafı baxımından əlverişli şərait yaradır. Turizm sektorunda infrastruktur və kommunal xidmətlərlə bağlı bir sıra güzəştlər edilməlidir. Bunlar kompleks şəkildə hazırlanarsa, Azərbaycan yaxın beş il ərzində regionun ən inkişaf etmiş ölkələrindən birinə çevrilə bilər”.
Kəmalə Vəliyeva
Paraqraf.com
