Azərbaycanda kartla ödənişlər zamanı banklar tərəfindən tətbiq olunan xidmət haqları yenidən müzakirə mövzusuna çevrilib. Müştərilər kartla ödəniş etdikdə kartı buraxan bank və ödənişi qəbul edən bank arasındakı hesablaşmalara görə xidmət haqqı tutulur. Bu ödənişlər isə ticarət obyektləri tərəfindən banklara ödənilir.
Məsələ ilə bağlı Baku TV-nin videomaterialında da məlumat verilib.
Mərkəzi Bankın müvafiq qərarına əsasən, iyunun 1-dən etibarən bu xidmət haqqının yuxarı həddi bəzi sahələr üzrə aşağı salınacaq.
İqtisadçı-ekspert Natiq Cəfərli Paraqraf.com-a açıqlamasında bildirib ki, post-terminal xidmətləri adı altında banklar kifayət qədər yüksək faiz tətbiq edir:
“Yəni Visa və MasterCard Azərbaycanda yüksək faiz götürür. Bəzi hallarda bu göstərici 2 faiz və daha çox olur. Bu isə kifayət qədər yüksəkdir. Dünya ortalamasında bu rəqəm təxminən 0,8 faiz təşkil edir. Əgər Mərkəzi Bank bu məsələni tənzimləyibsə, bu, müsbət addımdır. Bu dəyişiklik həm ticarət, həm də iaşə obyektlərinin xərclərinin azalmasına səbəb ola bilər. Nəticədə isə məhsul qiymətlərinə də müsbət təsir göstərə bilər”.
Kəmalə Vəliyeva
Paraqraf.com
