Milli Məclisdə istifadəsiz qalan kənd təsərrüfatı torpaqları ilə bağlı yeni təklif səsləndirilib. Bildirilib ki, illərdir müxtəlif səbəblərdən əkilib-becərilməyən torpaq sahələrinin yenidən dövriyyəyə qaytarılması üçün onların dövlət mülkiyyətinə alınması məsələsi nəzərdən keçirilə bilər. Bu yanaşma kənd təsərrüfatının inkişafı və torpaq resurslarından daha səmərəli istifadə baxımından aktuallaşır.
Millət vəkili Vasif Qafarov Milli Məclisdə çıxışı zamanı bu məsələyə toxunaraq yeni təkliflə çıxış edib.
O Astara rayonunda 30 ildir istifadəsiz qalan torpaqların dövlətə qaytarılmasını təklif edib.
Deputat qeyd edib ki, 1996-cı ildə həyata keçirilən aqrar islahat zamanı Astara rayonunun Pensər, Siyaku, Kakalos və Suparibağ ərazi inzibati dairələri üzrə 412 hektar ərazi 4954 ailə arasında bölüşdürülüb:
“Hər bir ailəyə 1-5 sot, bəzi hallarda 10 sota qədər torpaq sahəsi düşüb. Ən problemli məsələlərdən biri də odur ki, 1-5 sot torpaq alan ailəyə bu torpaq elə bir şəkildə kəsilib verilib ki, bu torpağı istifadə etmək faktiki olaraq qeyri-mümkündür. 30-50 sm və ya 1 metr enində və 100-150-200 metr uzunluğunda velosiped zolaqları şəklində verilən bu torpaq sahələrindən kəndli faktiki olaraq istifadə edə bilmir. Bu, mümkün də deyil. Bu torpaqların hansısa bir sahibkar tərəfindən satın alınması da mümkün olmayıb. Nəticədə 30 ildir ki, bu torpaqlar istifadəsiz qalıb”.
V. Qafarov qeyd edib ki, bu torpaqların səmərəli istifadə olunması və əkin dövriyyəsinə qaytarılmasından ötrü onlar dövlət tərəfindən kompensasiya ödənilməklə torpaq sahiblərindən alınaraq dövlət mülkiyyətinə qaytarılsın və sahibkarlara icarəyə verilsin.
Bu addımla 30 ildir istifadəsiz qalan həmin torpaqlar əkin dövriyyəsinə qaytarıla bilər və ölkəyə fayda təmin edilə bilər.
Qeyd edək ki, kəndlilərə torpaq verilsə də, onu əkib becərmək imkanı yoxdu. Yəni subsidiya azlığı, yaxud texnika ilə təminatın olmaması problemlər yaradır.
Məsələ ilə bağlı “Paraqraf.com”un sorğusuna Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidmətindən cavab olaraq bildirilib ki, kənd təsərrüfatı təyinatlı torpaqlar mülkiyyət formasından asılı olaraq aidiyyəti üzrə rayon icra hakimiyyətləri, bələdiyyələr və xüsusi mülkiyyət sahibləri tərəfindən icarəyə verilir.
Yerli icra hakimiyyətləri tərəfindən əkinçiliyin inkişafı məqsədilə hüquqi və fiziki şəxslərin icarəsinə verilmiş torpaq sahələri ayrılma məqsədinə uyğun istifadə edilmədiyi halda yerli icra hakimiyyəti tərəfindən verilmiş sərəncam və bağlanmış icarə müqaviləsi ləğv edilərək geri qaytarılır və digər hüquqi və fiziki şəxslərin icarəsinə ayrılır.
Qeyd edilib ki, 2021-2025-ci illər ərzində 16000 hektara yaxın kənd təsərrüfatı təyinatlı əkin torpaq sahəsi geri qaytarılaraq təkrar istifadəyə verilib.
Torpaqların əkin dövriyyəsinə cəlb edilməsinin məqsədi müasir aqrotexniki vasitələrdən istifadə etməklə ölkədə əkinçiliyin intensiv formada inkişafına və ərzaq təhlükəsizliyinə töhfə verməkdir.
Kəmalə Vəliyeva
Paraqraf.com
