AMB nümayəndə heyəti Dünya Bankı və IMF-nin toplantılarında iştirak edəcək

Azərbaycan Mərkəzi Bankının (AMB) nümayəndə heyətinin ABŞ-yə səfəri başlayıb.

Paraqraf.com bu barədə AMB-yə istinadən xəbər verir.

Məlumata görə, Mərkəzi Bankın sədrinin birinci müavini Əliyar Məmmədyarovun rəhbərlik etdiyi nümayəndə heyəti Dünya Bankı (WB) və Beynəlxalq Valyuta Fondunun (IMF) Yaz Toplantılarında iştirak məqsədilə Vaşinqton şəhərinə işgüzar səfərə yola düşüb.

Bildirilib ki, Yaz Toplantıları çərçivəsində Mərkəzi Bankın nümayəndə heyəti Azərbaycanın da daxil olduğu Seçki Qrupunun toplantısında və bir sıra tədbirlərdə iştirakı nəzərdə tutulur. Bu müddətdə WB və IMF-nin rəhbər vəzifəli şəxsləri, Mərkəzi Bank ilə əməkdaşlıq edən bir sıra maliyyə-investisiya təşkilatları və ABŞ-nin rəsmi qurumları ilə ikitərəfli görüşlərinin keçirilməsi də planlaşdırılır.

 

Paraqraf.com