Bu ay Mərkəzi Seçki Komissiyasının (MSK) beşillik səlahiyyət müddəti başa çatır və qurum yenidən formalaşdırılmalıdır. Komissiyanın 18 üzvü var. Seçki Məcəlləsinə əsasən, MSK parlamentdəki deputatların sayına uyğun olaraq çoxluq, azlıq təşkil edən və bitərəf deputatların təmsilçilərindən formalaşdırılır. Yeni tərkib təsdiqləndikdən sonra isə komissiyanın ilk iclasında sədr, sədr müavini və iki katib açıq səsvermə yolu ilə seçilir.
Bəs bu il tərkibdə dəyişiklik olacaq? MSK sədri Məzahir Pənahov postunda qalacaqmı?
Ağ Partiya sədri Tural Abbaslı “Paraqraf.com”a bildirib ki, Mərkəzi Seçki Komissiyasında (MSK) dəyişikliklər parlament seçkilərindən sonra olmalıdır:
“Çünki qanunvericiliyə görə MSK-nı parlament formalaşdırır və onun tərkibi əsasən çoxluq və azlıqlardan ibarətdir. Hər parlament seçkilərindən sonra parlament daxilindəki partiyaların sayı dəyişdiyi üçün MSK da buna uyğun yenidən formalaşdırılmalıdır. Lakin bu il MSK bir ildən artıq müddətdə yenidən təşkil olunmağa çalışır. Bu isə artıq gecikmiş dəyişiklikdir. Seçki komissiyasının tərkibinin formalaşması haqqında qanun dəyişdirilməlidir. Çünki hazırkı Mərkəzi Seçki Komissiyasının formalaşması mexanizmi indiki reallıqlara cavab vermir. Dünya siyasətində isə birtərəf anlayışı yoxdur”.
O qeyd edib ki, bitərəflərin seçilmə mexanizmi şəffaf deyil:
“Yəni bu, dolayısı ilə MSK-da iqtidarın üstünlüyünü təmin etmək üçün formalaşdırılmış mexanizmdir. MSK-nın tərkibi ancaq parlamentdə təmsil olunan partiyalardan ibarət olmalıdır”.
Partiya sədri əlavə edib ki, bu il parlamentin tərkibində yeni partiyalar var:
“Azərbaycan Milli İstiqlal Partiyası, Böyük Azərbaycan Partiyası və digər partiyalar var. Bu il bu partiyaların təmsilçilik şansı yaranır. Partiyalardan xaric olunanlar da var. Məzahir Pənahovun yenidən seçilib-seçilməməsi iqtidarın qərarı olacaq. Çünki altı namizədi iqtidar, altı namizədi müxalifət, altı namizədi isə bitərəflər təqdim edəcək. Əgər iqtidar öz siyahısında Məzahir Pənahovu yenidən təqdim edərsə, MSK-nın ilk iclasında da elə o seçiləcək”.
Abbaslının sözlərinə görə, MSK tərkibi dəyişsə, daha uğurlu olar:
“Yeni yanaşma, yeni insanlar gəlsə, daha faydalı olar. Seçki qanunvericiliyinə uyğun seçki aparılmalıdır. Bu MSK-nın fəaliyyət göstərdiyi heç bir seçki dövründə Azərbaycan Seçki Məcəlləsinə uyğun seçki keçirilməyib. Lakin siyasi idarə dəyişməyəcəksə, MSK-nın dəyişməsinin heç bir önəmi yoxdur”.
Kəmalə Vəliyeva
Paraqraf.com
