“Böyük Dəbilqə” turnirinin ilk günündə Azərbaycanın 4 idmançısı mübarizəyə start verir

Bu gün Gürcüstanın paytaxtı Tbilisidə cüdo üzrə “Böyük Dəbilqə” turniri start götürəcək.

Paraqraf.com xəbər verir ki, Azərbaycan təmsilçilərindən 4-ü tatami üzərinə çıxacaq.

Turan Bayramov (66 kq) 1/32 finalda fransalı Kilian Noelə üz-üzə gələcək. Eyni çəkidə Rəşad Yelkiyev 1/16 finalda Niderland təmsilçisi Yoxem van Hartenlə qarşılşacaq.

Qadınların mübarizəsində isə Könül Əliyeva (48 kq) Monqolustan idmançısı Mişel Altanşaqayın müqavimətini qırmağa çalışacaq. Mübarizəyə 1/8 finaldan başlayan Leyla Əliyeva (52 kq) isə İsraildən olan Gefen Primo ilə münasibətlərə aydınlıq gətirəcək.

“Böyük Dəbilqə”nin təsnifat mərhələsi saat 10:00-da, final bloku isə 17:00-da başlayacaq . Yarış martın 22-də başa çatacaq.

 

Paraqraf.com