Nağdsız ödəniş sistemləri gündəlik həyatımızı xeyli asanlaşdırıb. Kartlar və mobil tətbiqlər vasitəsilə alış-verriş etmək sürətli və təhlükəsiz görünür. Bununla belə, bəzi insanlar üçün nağdsız ödənişlər xərclərə nəzarəti çətinləşdirə və impulsiv alışların artmasına səbəb ola bilər.
Maraqlıdır, nağdsız ödənişlər həqiqətən rahatlıq təmin edir, yoxsa insanların maliyyə intizamını zəiflədir?
İqtisadçı Rəşad Həsənov “Paraqraf.com”a bildirib ki, istehlakçı davranışı fərqlidir və hər hansısa addım şəxs üzərində fərqli effektlər formalaşdıra bilər:
“Müəyyən hallarda, xüsusilə kredit kartları ilə nağdsız şəkildə xərcləmə məsuliyyətsiz istehlakçı davranışını müəyyən dərəcədə təşviq edə bilər. Xüsusilə də keçid mərhələsinin ilkin dövrlərində belə bir məqam müzakirə mövzusu idi. İnsanlar ənənəvi olaraq nağd vəsaitlərə alışıblar. Bugünkü texnologiyalar nağdsız şəkildə gəlirlərin daha şəffaf idarə olunması imkanı yaradır. Bununla insanlar büdcələrinin hansı formada dəyişdiyini görə bilirlər. Bu isə insanlara daha məsuliyyətli davranmağı aşılayır. İstehlakçıların qəbul etdiyi qərarlar hər zaman rasional izah olunmur. Bununla belə, nağdsız ödənişlərdən istifadə edənlərin daha çox rəqəmsal bacarıqlara malik və yeniliklərə açıq şəxslər olduğunu nəzərə alsaq, bu insanların qərar qəbuletmədə rasionallığa üstünlük verməsi mümkündür. Nağdsız ödənişlər məsuliyyətsiz xərcləmə üçün imkan yaratmır”.
Kəmalə Vəliyeva
Paraqraf.com
