Minimum əməkhaqqı: sosial təminat, yoxsa formal rəqəm?

Azərbaycanda minimum əməkhaqqının artırılması ilə bağlı qərarlar tez-tez gündəmə gəlir. Rəsmi açıqlamalarda bu addımların əhalinin sosial rifahının yaxşılaşdırılmasına xidmət etdiyi bildirilir. Lakin gündəlik həyatın reallığı göstərir ki, ərzaq məhsullarının, kommunal xidmətlərin, kirayə mənzillərin və nəqliyyat xərclərinin qiyməti də paralel şəkildə artmaqda davam edir. Bu isə xüsusilə aşağı gəlirli ailələrin büdcəsinə ciddi təsir göstərir.

Bəs minimum əməkhaqqı real yaşayış xərclərini qarşılamaq üçün kifayət edirmi, yoxsa bu məbləğ sadəcə formal sosial göstərici olaraq qalır?

İqtisadçı Eldəniz Əmirov “Paraqraf.com”a bildirib ki, minimum əməkhaqqının əsas məqsədi əmək bazarında ən aşağı ödəniş səviyyəsini qorumaqdır:

“Yəni işəgötürən öz səlahiyyətlərindən və mövcud vəziyyətdən istifadə edərək işçiyə bundan daha aşağı əməkhaqqı təklif edə bilməz. Bu baxımdan minimum əməkhaqqının mahiyyəti məhz bundan ibarətdir. Eyni zamanda, sosial siyasətin müəyyən olunmasında da minimum əməkhaqqı baza göstəricisi kimi istifadə olunur”.

O qeyd edib ki, növbəti illərdə minimum əməkhaqqının hər il artırılması nəzərdə tutulur:

“Bu il minimum əməkhaqqı 400 manatdır. Lakin bu göstərici inflyasiya səviyyəsinə uyğun olaraq artırılacaq. Bununla yanaşı, artımların təxminən 10% civarında olması da mümkündür”.

Kəmalə Vəliyeva

Paraqraf.com