Martın 14-də Ramazan ayı münasibətilə “Yağmur Ailəvi Restoranı”nda şəhid ailələrinin iştirakı ilə iftar süfrəsi təşkil olunub. Tədbir Ramazan ayının mənəvi dəyərlərini bölüşmək, həmrəylik və xeyriyyəçilik ənənələrini təşviq etmək məqsədi daşıyıb.
İftar süfrəsi “Paraqraf.com” xəbər portalının təsisçisi Türkan Səfərova, Şüküfə Səfərova və “Həmvətənlərə Dəstək İctimai Birliyi”nin sədr müavini Simarə Süleymanovanın təşəbbüsü ilə təşkil edilib.
Tədbirin aparıcılığını Vüqar Təmkin edib. İftar süfrəsi zamanı şəhid ailələrinə xüsusi diqqət göstərilib, onlara müxtəlif hədiyyələr təqdim olunub. Hədiyyələr “Şuşa 44” şirkətinin rəhbəri, əslən Qərbi Azərbaycandan olan İlqar Əhmədov tərəfindən göndərilib. Qeyd olunub ki, İlqar Əhmədov Rusiyada şəhidlərin xatirəsinə həsr olunan filmlərin çəkilişində də iştirak edib və bu mövzuda bir sıra layihələrə imza atıb.
Bundan əlavə, “Miray Parfum”un rəhbəri İsmayılov Elməddin Şakir oğlu da şəhid ailələrinə hədiyyələr göndərərək tədbirə dəstək göstərib.
Tədbirdə həmçinin millət vəkili Ceyhun Məmmədovun nümayəndələri iştirak edərək çıxış ediblər. Çıxışlarda Ramazan ayının mərhəmət, paylaşma və birlik rəmzi olduğu vurğulanıb, şəhid ailələrinə göstərilən diqqət və qayğının cəmiyyət üçün mühüm əhəmiyyət daşıdığı qeyd edilib.
Gecədə müğənnilər Günəş və Fərman Qəmbərov tərəfindən xalq musiqiləri ifa olunub və proqram iştirakçılar üçün xüsusi rəng qatıb.
Səmimi atmosferdə keçən iftar proqramı iştirakçılar arasında birlik və həmrəylik ruhunun daha da möhkəmlənməsinə töhfə verib.
Paraqraf.com
