Bəzən əsl həqiqəti görmək üçün sözlərə ehtiyac qalmır. Yetər ki, baxışların obyektiv, sağlam və adekvat olsun. Elə də sözlər var ki, onlar, əksinə həqiqəti gizlədir. Bu günlərdə yaşanan hadisələr ilə bağlı həqiqəti bilmək xalqın haqqıdır. Odur ki, hadisələrin ardıcıllığına diqqət yetirək:
– martın 4-də səhər saatlarında Azərbaycan Respublikasının Prezidenti İlham Əliyev İran İslam Respublikasının ölkəmizdəki səfirliyində olub, İran İslam Respublikasının Ali Rəhbəri Ayətullah Seyid Əli Xameneinin və bir çox mülki şəxsin həlak olması ilə əlaqədar başsağlığı verib;
– martın 5-də səhər saatlarında Naxçıvana İran ərazisindən dron hücumları həyata keçirilib və mülki obyektlərə zərər yetirilib.
Axı soyuqqanlı şəkildə bunu necə adlandırmaq olar?! Əslində, Prezident İlham Əliyev 5 mart tarixində Təhlükəsizlik Şurasının iclasında çıxış edən zaman baş verənlərə çox dəqiq ad verib: “Onların törətdiyi bu terror aktı bütün başqa çirkin amillərlə yanaşı, böyük nankorluq nümunəsidir”. Hadisələrin bu xronologiyasını əsla unutmaq olmaz. Bu xronologiya Azərbaycanda yazılan və bundan sonra yazılacaq bütün müasir siyasi ədəbiyyata daxil olmalıdır. Bu xronologiya beynəlxalq münasibətlər sisteminin müasir “əxlaqını” ifşa edir. Bu xronologiya riyakarlığı və siyasətin iç üzünü ifşa edir. Nəhayət, bu xronologiya böyük xalqımız və ayrıca olaraq hər birimiz üçün unudulmaz dərsdir.
Tərəddüd etmədən deyə bilərik ki, baş verən hadisələr bu günlərdə gözəl məmləkətimizin hər bir vətəndaşını düşündürür və dərindən narahat edir. Təsadüfi deyil ki, hər bir məsuliyyətli vətəndaş hadisələr ilə bağlı öz fərdi münasibətini bildirir və baş vermiş terror aktını şiddətlə qınayır. Bu günlərdə Azərbaycanı müxtəlif təlatümlərdən qoruyan və daha güclü edən milli həmrəylik küləyi növbəti dəfə əsdi. İnsanlar yenə də ölkəmizdə yaşanan dövlət-cəmiyyət birliyinə şahidlik etdi. Siyasi partiyalar, ictimai fəallar, müxtəlif təşkilatlar dərhal münasibət bildirdilər və rəsmi bəyanatlarla çıxış etdilər. Ürəkdən gələn və öz dövlətinə sadiqlikdən qaynaqlanan bu cür təşəbbüskarlıq Azərbaycan xalqının səfərbərlik potensialının təcəssümüdür. 44 günlük müharibədə əldə etdiyimiz tarixi Qələbədən sonra bütün dünya yenidən dövlət və xalqımızın sözügedən potensialından xəbərdar oldu.
Azərbaycan xalqı müasir dünyada Qələbənin tamını dadmış nadir xalqlardandır, bu səbəbdən də Qələbənin dəyərini çox gözəl bilir. Bir nankor dron hücumu ilə bu xalqın içinə nifaq salmaq mümkünsüzdür. Əksinə, bu cür təxribatlar bizi daha güclü və daha inamlı edir. Yeri gəlmişkən, xalqın içində nifaq salmaq arzusunda olanlar və bunu qaranlıq həyatlarının məqsədi kimi bilənlər alçaqcasına baş verənləri hətta “təsadüfi hadisə” adlandırmağa çalışırlar. Bununla da terrora bəraət qazandırmaq istəyirlər. Yuxarıda göstərilən hadisələrin xronologiyasına diqqət yetirmək kifayət edər ki, bu cür ünsürlərin davranışını adi məsuliyyətsizlik kimi yox, məhz xainlik kimi qiymətləndirək.
Müxtəlif təxribat, intriqa və təzyiqlərə rəğmən Prezident İlham Əliyev siyasətdə milli maraqların üstünlüyünü daim nümayiş etdirib. Dövlət başçısı üçün milli maraqlar siyasi münasibətlərdə hər zaman toxunulmaz “qırmızı cizgi” olub. Ötən illər ərzində buna dəfələrlə şahidlik etmişdik. Onu da çox yaxşı bilirik ki, Prezident konkret məsələlər ilə bağlı hər zaman açıq fikir səsləndirir. Bu dəfə də istisna olmadı: “Dəfələrlə İran tərəfinə, xüsusilə keçən il baş vermiş toqquşmalardan sonra bildirilmişdir ki, Azərbaycan ərazisindən heç bir qonşu dövlətə qarşı istifadə olunmayacaq. Biz buna imkan verməyəcəyik, necə ki, heç vaxt bu günə qədər imkan verməmişik” (Təhlükəsizlik Şurasının 5 mart 2026-cı il tarixli iclası).
Bəli, növbəti dəfə Azərbaycan xalqı və beynəlxalq ictimaiyyət Prezident İlham Əliyevin dönməz, prinsipial siyasi iradəsinə şahidlik etdi. Bu həmin o iradədir ki, onun sayəsində bütün təzyiqlərə rəğmən Azərbaycan öz müstəqilliyini qoruya bildi, inkişaf etdi, beynəlxalq münasibətlər sisteminin vacib iştirakçısına çevrildi, ərazi bütövlüyünü bərpa etdi, habelə dünyada qlobal tendensiyaları müəyyən edən ABŞ kimi dövləti özünə strateji tərəfdaşa çevirdi. Burada prinsipial olaraq onu yada salmalıyıq ki, hər bir növbəti uğur əldə ediləndən sonra Prezident daim bu fikrini təkrarlayır: “Mən həmişə xalqın dəstəyinə arxalanmışam, mənə güc verən xalqın mənə olan inamıdır”. Hər birimizin göz bəbəyi kimi qorumalı olduğu milli həmrəylik məhz həmin inamın təzahürüdür. Odur ki, zamanında müxtəlif qüvvələr tərəfindən yalnız təxribat aləti kimi istifadə olunan siyasi partiyaların xüsusilə bu kimi günlərdə dövlətin maraqlarını müdafiə edən mövqedən çıxış etməsi faktı onların məhz cəmiyyətin səfərbərlik potensialını artıran demokratik siyasi institut kimi inkişaf etməsinə zəmin yaradır.
Politoloq Asif Adil
