Yaxın Şərqdə gərginliyin pik həddə çatdığı bir vaxtda İranda baş verən hadisə regionun gələcək taleyi ilə bağlı ciddi suallar doğurub. Ölkənin ali dini liderinin ölümü ilə bağlı yayılan məlumatlar yalnız İran daxilində deyil, beynəlxalq siyasi arenada da yeni mərhələnin başlanğıcı kimi qiymətləndirilir.
İranın ali dini lideri Ayətullah Əli Xameneinin ABŞ və İsrailin hücumları nəticəsində həyatını itirdiyi təsdiqlənib.
Maraqlıdır, Xameneinin ölümündən sonra İranı hansı siyasi dəyişikliklər gözləyir?
Politoloq Ramiyə Məmmədova Paraqraf.com-a bildirib ki, Xameneinin öldürülməsindən sonra İran tərəfindən açıqlama verilib və başda Pezeşkian olmaqla 3 nəfərlik konsey yaradılıb:
“Pezeşkian prezident olaraq ölkənin idarəetməsini həyata keçirir. Burada nəzərə almaq lazımdır ki, SEPAH-ın gücünü azaltmaq olmaz. Çünki hərbi güc İranda daha çox öz rolunu tapıb. Deyilir ki, 2-3 gün ərzində dini lider seçiləcək. Ancaq yeni liderin kim olacağı barəsində tam açıqlama verilməyib. Konseydə həmin dini lider seçiləcək. Yeni gələcək lider ola bilər ki, Xameneidən daha fərqli siyasət yürütsün. Xamenei indiyə qədər qatı dini lider kimi gündəmdə olub. Ancaq yeni seçiləcək lider prezidentlərlə birlikdə daha loyal siyasət yürüdə bilər. İranın zaman qazanması bugünkü gündə çox vacibdir. İran həm daxildə, həm də xaricdə gedən proseslərdə artıq başa düşməlidir ki, özünə düşmən toplamaq yox, daha çox dost qazanmalıdır. İranın ən böyük problemlərindən biri ətrafındakı qonşu dövlətlərlə gərgin münasibətlərinin olmasıdır. İranın şiəliyi əsas tutaraq digər sünni dövlətlərlə münaqişə aparması doğru siyasət deyil”.
O əlavə edib ki, İran daxildə və qonşuları ilə münasibətləri normallaşdırmalıdır:
“Xameneinin öldürülməsi daxildə gedən proseslərdə həm sevinc, həm də kədər doğuran reaksiyalara səbəb olub. İranda həm siyasi, həm də iqtisadi proseslər kifayət qədər mürəkkəbdir. Buna görə də yeni seçiləcək lider bütün bunları nəzərə alaraq daha balanslı siyasət yürütməlidir. Həmçinin xarici siyasətdə daha düzgün istiqamət seçilməsi İran üçün daha uğurlu ola bilər”.
Kəmalə Vəliyeva
Paraqraf.com
