Bakıda fəaliyyət göstərən “Pxali Xinkali” restoranının filiallarından birində müştəridən power bank istifadə etdiyinə görə əlavə ödəniş alınıb.
Ondan bunun üçün 2 manat ödəniş istənilib.
Müştəri qeyd edir ki, menyuda “power bank” xidmətinin qiyməti göstərilməyib. Ödəniş barədə əvvəlcədən niyə məlumat verilmədiyini soruşduqda isə həmin “power bank”ı hansı ofisiantın gətirdiyinin müəyyən olunmadığı bildirilib.
Azad İstehlakçılar Birliyi (AİB) sədri Eyyub Hüseynov “Paraqraf.com”a açıqlamasında bildirib ki, bu istehlakçı hüququnun pozulmasıdır:
“Əgər restoran müştəridən belə vasitələrdən istifadəyə görə əlavə ödəniş tələb edəcəksə, bunu menyuda qeyd etməlidir. Bu, qeyd edilmədiyi halda, istehlakçı hüququ pozulduğu üçün 012-599-76-00 telefonu ilə Prezident yanında Antiinhisar və İstehsalat Bazarına Nəzarət Dövlət Agentliyi məlumat verməlidir ki, ödəniş geri qaytarılsın”.
Məsələ ilə bağlı vəkil Lalə Salmanova isə bildirib ki, istehlakçı şəxs tələbatını ödəmək məqsədi ilə mal, iş və xidmətlərdən istifadə edən, onları alan, sifariş verən, yaxud almaq və ya sifariş vermək niyyəti olan şəxsdir:
“Belə ki, istehlakçı və xidmət göstərən şəxs arasında razılaşma həm yazılı, həm də şifahi formada ola bilər. Biz hər hansı bir restorana daxil olduqda bizə menyu – xidmət siyahısı və onun məbləğləri təqdim edilir. Əgər bizə göstərilməyən xidmətə görə pul tələb edilirsə və ya göstərilən xidmətin məbləği sonda gözlənilməz bir rəqəm olarsa, bu özü də istehlakçı hüquqlarının pozulması deməkdir.
Restoranlar tərəfindən servis haqqının menyuda qeyd edilməməsi və ya bizə əvvəlcədən bildirilməməsi zamanı güman edilir ki, servis haqqı ağlabatan bir məbləğdir. Lakin bu məbləğin şişirdilmiş məbləğə çevrilməsi halı da istehlakçı hüquqlarının pozulmasıdır. Bu halda şəxs Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinə və ya məhkəməyə müraciət edə bilər”.
Kəmalə Vəliyeva
Paraqraf.com
