DİM: “İmtahanın çətin olması ilə bağlı bəzi iştirakçıların səsləndirdiyi mülahizələr həqiqətə uyğun olmur”
“Dövlət İmtahan Mərkəzi tərəfindən keçirilən buraxılış və qəbul imtahanlarının məzmunu müəyyən edilərkən istinad olunan metodiki çərçivə çox aydın və birmənalıdır. Bunlar ölkəmizdə qüvvədə olan təhsil proqramı, dərsliklər və onların əsasında hazırlanmış qəbul proqramlarıdır. İmtahanların məzmunu hazırlanarkən qeyd olunanlar nəzərə alınır”.
Bu fikirləri “Paraqraf.com”a açıqlamasında Dövlət İmtahan Mərkəzinin (DİM) Mətbuatla iş sektorunun müdiri Xanlar Xanlarzadə deyib.
Onun sözlərinə görə, tapşırıqların mürəkkəblik dərəcəsi hər bir imtahanda müxtəlif hazırlıq səviyyəsinə malik abituriyentləri bir-birindən fərqləndirmək məqsədi daşıyır. Bu səbəbdən bütün fənlər üzrə test blokunda asan, orta və çətin test tapşırıqlarından istifadə edilir:
“Çünki imtahanda yalnız zəif və orta hazırlıqlı abituriyentləri deyil, yaxşı hazırlıqlı iştirakçıları da bir-birindən fərqləndirmək tələb olunur.
Ümumiyyətlə, imtahanın asan və ya çətin olması nisbi məsələdir. Bu, imtahan iştirakçısının hazırlıq səviyyəsindən asılı olaraq dəyişir. Hər hansı bir tapşırıq kimə görə çətin, kimə görə isə asan ola bilər. Ancaq ənənəvi təhlillər göstərir ki, test tapşırıqlarının çətin olması ilə bağlı bəzi iştirakçıların səsləndirdiyi mülahizələr həqiqətə uyğun olmur”.
Xanlar Xanlarzadə qeyd edib ki, Dövlət İmtahan Mərkəzi imtahanlardan dərhal sonra bütün tapşırıqları ictimaiyyətə təqdim edir:
“İmtahanda iştirak edənlər, həmçinin valideynlər, müəllimlər və ekspertlər bütün test tapşırıqlarının izahını əldə edə bilirlər. Sual kitabçaları da imtahan iştirakçılarına verilir. Bütün bunlar imtahanın məzmununun ictimaiyyət üçün nə qədər açıq olmasının bariz göstəricisidir”.
Kəmalə Vəliyeva
Paraqraf.com
