Sumqayıt Dövlət Universiteti (SDU) QS Dünya Universitetləri Reytinqi: Avropa 2026 nəticələrinə əsasən 531–540-cı pillədə qərarlaşıb. Universitet ötən illə müqayisədə ümumi balını 62 faiz artıraraq 12,5-dən 20,3 bala yüksəldib.
Reytinq göstəricilərinə görə, SDU əvvəlki ildə Avropa universitetlərinin 29,6 faizini, cari ildə isə artıq 44 faizini geridə qoymağa nail olub. Bu nəticə universitetin beynəlxalq akademik mühitdə mövqeyinin əhəmiyyətli dərəcədə möhkəmləndiyini göstərir.
Qeyd edək ki, Avropanın 42 ölkəsində fəaliyyət göstərən 5000-dən çox ali təhsil müəssisəsi arasından yalnız 958 universitetin daxil olduğu bu nüfuzlu və yüksək rəqabətli reytinqdə SDU-nun təmsil olunması mühüm nailiyyət kimi qiymətləndirilir.
SDU “Müəllim–tələbə nisbəti” indikatoru üzrə Avropanın ən yaxşı 50 universiteti sırasında yer alıb. Eyni zamanda universitet “Akademik reputasiya” və “İşəgötürənlər arasında reputasiya” göstəriciləri üzrə ilk 301 universitet qrupunda qərarlaşıb.
Universitet QS Avropa reytinqinin regional siyahılarında da fərqlənib. Belə ki, SDU Qərbi Asiya regionu üzrə ilk 50 universitet sırasında yer alıb, Azərbaycan üzrə siyahıya daxil olan 15 ali təhsil müəssisəsi arasında 9-cu, ölkənin regional universitetləri arasında isə 1-ci yerdə qərarlaşıb.
Universitetin inkişaf dinamikasını əks etdirən əsas indikatorlar üzrə artım aşağıdakı kimidir:
-
Akademik reputasiya: 14,9-dan 27,5-ə yüksəlib;
-
İşəgötürənlər arasında reputasiya: 14-dən 32-yə çatdırılıb;
-
Məşğulluq göstəriciləri: 11,2-dən 29,2-yə yüksəlib;
-
Əcnəbi tələbələrin müxtəlifliyi: 4,4-dən 4,9-a artıb;
-
Hər müəllimə düşən məqalə sayı: 1,8-dən 2,2-yə yüksəlib;
-
Beynəlxalq tədqiqat şəbəkəsi göstəricisi: 1-dən 1,2-yə çatdırılıb.
Bu nəticələr Sumqayıt Dövlət Universitetinin beynəlxalq reytinqlərdə dayanıqlı inkişaf strategiyasının uğurla həyata keçirildiyini göstərir.
Paraqraf.com
