Avropa İttifaqı-ABŞ ticarət müqaviləsinin artıq etibarlı gələcəyi yoxdur.
Paraqraf.com xəbər verir ki, bu mövqe Avropa Parlamentində ABŞ prezidenti Donald Trampın Qrenlandiyanın alınmasına qarşı çıxanlara qarşı tariflər barədə açıqlamalarından sonra formalaşıb.
Bloomberg-in yazdığına görə, Avropa Parlamentinin ən böyük siyasi qüvvəsi olan Avropa Xalq Partiyasının (EPP) prezidenti Manfred Veber ABŞ-lə ticarət sazişinin təsdiqlənməsinin hazırda mümkün olmadığını bildirib: “Avropa Parlamenti Aİ ilə ABŞ arasında ticarət sazişi ideyasını dəstəkləyir, lakin Donald Trampın Qrenlandiya ilə bağlı təhdidləri nəzərə alınmaqla, onun təsdiqlənməsi bu mərhələdə mümkün deyil. ABŞ mallarına tariflərin azaldılması ilə bağlı razılaşmalar dayandırılmalıdır. Bloomberg-in məlumatına görə, Avropa Komissiyasının prezidenti Ursula fon der Lyayenin 2025-ci ilin yayında Trampla əldə etdiyi ticarət sazişi artıq qismən həyata keçirilib, lakin Avropa Parlamenti tərəfindən yekun təsdiq tələb olunur.
Sənəddə Brüsselin Amerika sənaye məhsullarına və müəyyən kənd təsərrüfatı mallarına tarifləri ləğv etmək öhdəliyi müqabilində əksər Aİ mallarına 15 faiz ABŞ tarifinin tətbiq edilməsi nəzərdə tutulurdu. Fon der Lyayen iki tərəf arasında tammiqyaslı ticarət müharibəsinin qarşısını almaq üçün bu şərtlərlə razılaşıb.
Avropa Parlamentinin Beynəlxalq Ticarət Komitəsinin rəhbəri Bernd Lange bildirib ki, ABŞ təhdidlərindən əl çəkənə qədər sazişin həyata keçirilməsi üzrə işlər dayandırılmalıdır.
Bundan əlavə, Lange Avropa İttifaqını iqtisadi təzyiqə cavab vermək üçün heç vaxt istifadə olunmayan güclü Aİ mexanizmi olan Məcburiyyətə Qarşı Aləti (ACI) tətbiq etməyə çağırıb. Bu alət güzgü tariflərinin tətbiqinə, texnologiya şirkətlərinə əlavə vergilərə və ya dövlət satınalmalarına girişin məhdudlaşdırılmasına imkan verir.
Avropa Parlamentinin Ticarət Komitəsinin üzvləri artıq ilkin məsləhətləşmələr aparıblar və bir həftə ərzində yenidən görüşməyi planlaşdırırlar. Bu arada, Avropa Parlamentinin Danimarkalı üzvü Per Klauzen parlament rəhbərliyinə ABŞ ilə sazişin dondurulmasını tələb edən məktuba 30 imza toplayıb.
Paraqraf.com
