Bakının Nərimanov rayonunda, Təbriz küçəsi 55 ünvanında yerləşən çoxmərtəbəli yaşayış binasının sakinləri ciddi problemlə üzləşiblər. Sakinlərin bildirdiyinə görə, 2025-ci ilin aprel ayından etibarən yağıntılı havalarda yağış suları binanın fasadından süzülərək birbaşa mənzillərin daxilinə axır.
Paraqraf.com xəbər verir ki, problemin xüsusilə binanın Təbriz küçəsinə baxan hissəsində, 4-cü blokda daha qabarıq şəkildə müşahidə edildiyi qeyd olunur. Sakinlər deyir ki, yağış yağarkən mənzillərin divar və pəncərələrindən su süzülür, daxili divarlar qaralır, evləri su basmaması üçün müxtəlif qablarla suyu yığmağa məcbur qalırlar. Bu vəziyyət onların həm maddi ziyana (təmir işlərinin sıradan çıxması), həm də ciddi mənəvi sarsıntıya məruz qalmasına səbəb olur.
Şikayətçilərin sözlərinə görə, problem yalnız mənzillərlə məhdudlaşmır. Binanın nisbətən yeni üzlənmiş fasadı da yağış sularının təsirindən aşınmağa başlayıb. Bildirilir ki, bu məsələ ilə bağlı müxtəlif vaxtlarda aidiyyəti qurumlara müraciətlər edilsə də, indiyədək real və effektiv tədbir görülməyib.
Sakinlər xəbərdarlıq edirlər ki, vaxtında müdaxilə olunmazsa, yağış mövsümünün şiddətlənməsi ilə binanın Heydər Əliyev Mərkəzinə baxan hissəsində yerləşən konstruksiyalara və mənzillərə daha ciddi ziyan dəyə bilər.
Məsələnin ciddiliyini sübut etmək məqsədilə sakinlər tərəfindən çəkilmiş video görüntülər aidiyyəti instansiyalara və redaksiyaya təqdim edilib. Videolarda yağış sularının mərtəbələr üzrə yayılması və mənzillərə daxil olması aydın şəkildə görünür.
Bina sakinləri aidiyyəti qurumlardan problemin təcili şəkildə araşdırılmasını, binanın texniki vəziyyətinin yoxlanılaraq yaranmış nasazlığın aradan qaldırılmasını xahiş edirlər. Əks halda, payız və qış aylarında vəziyyətin daha da ağırlaşacağı qaçılmaz hesab olunur.
Ləman
Paraqraf.com
