Güclü Dövlətin Lideri- Ali Baş Komandan, Prezident Cənab İlham Əliyevin Doğum Günü

Bu gün Azərbaycan xalqı müasir tarixinin taleyini dəyişmiş bir liderin – Azərbaycan Respublikasının Prezidenti, Müzəffər Ali Baş Komandan İlham Əliyevin doğum gününü qeyd edir. Bu tarix təkcə bir dövlət başçısının ad günü deyil, eyni zamanda müstəqil Azərbaycanın güclənmə, dirçəliş və Zəfər yolunun rəmzidir.

İlham Əliyevin siyasi fəaliyyəti milli maraqlara söykənən ardıcıl strategiya üzərində qurulub. Onun rəhbərliyi ilə Azərbaycan qısa zaman kəsiyində iqtisadi asılılıqdan regional güc mərkəzinə çevrilmiş, müstəqil qərar verən, söz sahibi olan dövlət statusu qazanmışdır. Siyasi sabitlik, güclü iqtisadi baza və sosial ədalət prinsipləri bu idarəçilik modelinin əsas sütunlarını təşkil edir.

Prezident İlham Əliyevin fəaliyyəti Azərbaycanın milli dövlətçilik ənənələrinin müasir tələblərlə sintezidir. O, Ulu Öndər Heydər Əliyevin siyasi irsini qoruyaraq, onu yeni çağırışlara uyğun şəkildə inkişaf etdirmiş, dövlət idarəçiliyində çeviklik, praqmatizm və strateji uzaqgörənlik nümayiş etdirmişdir. Məhz bu uzaqgörən siyasət Azərbaycanın uzun illər üzləşdiyi təhlükələri fürsətə çevirmişdir.

Azərbaycan Ordusunun gücləndirilməsi, müdafiə sənayesinin qurulması, milli təhlükəsizlik konsepsiyasının yenilənməsi İlham Əliyevin liderliyinin ən mühüm istiqamətlərindən biri olmuşdur. 44 günlük Vətən müharibəsində əldə edilən tarixi Qələbə bu siyasətin real nəticəsi kimi tarixə düşdü. Bu Zəfər təkcə hərbi uğur deyil, siyasi iradənin, milli birliyin və lider məsuliyyətinin təntənəsi idi.

Müharibədən sonrakı dövrdə Prezident İlham Əliyevin qarşıya qoyduğu əsas məqsəd azad edilmiş torpaqlarda həyatın bərpası və davamlı sülhün təmin olunmasıdır. Qarabağ və Şərqi Zəngəzurda həyata keçirilən irimiqyaslı layihələr göstərir ki, bu torpaqlar yalnız xatirələrin deyil, gələcəyin də məkanıdır. Yol infrastrukturu, enerji layihələri, sosial obyektlər və yaşayış kompleksləri Böyük Qayıdışın praktik təzahürüdür.

Prezident İlham Əliyev beynəlxalq münasibətlər sistemində də prinsipial mövqeyi ilə seçilir. O, heç bir təzyiqə boyun əymədən Azərbaycanın suveren hüquqlarını qoruyur, ölkəmizin maraqlarını qlobal müstəvidə açıq və qətiyyətlə ifadə edir. Bu mövqe Azərbaycanı etibarlı tərəfdaş və regionda sabitliyin əsas təminatçılarından birinə çevirib.

Bu gün İlham Əliyevin ad günü münasibətilə səslənən fikirlər bir daha sübut edir ki, Azərbaycan xalqı öz liderinə güvənir. Bu güvən təsadüfi deyil – o, real nəticələrə, qazanılmış uğurlara və tarixi ədalətin bərpasına əsaslanır.

Doğum gününüz mübarək, cənab Prezident!
Azərbaycan naminə atdığınız hər addım, verdiyiniz hər qərar tarix qarşısında məsuliyyətin və xalqa sədaqətin nümunəsidir. Güclü Azərbaycan yolunda yeni uğurlar arzulayırıq.

 

Zemfira Məmmədova 

Ziyalı jurnalı redaksiyasının xüsusi müxbiri