Bəzi insanlar bayramları, xüsusilə də Yeni ili xoşbəxt emosiyalarla qarşılamırlar. Adətən Yeni il sevinc, ümid və yeni başlanğıclarla assosiasiya olunsa da, hər kəs üçün bu dövr eyni hisslərlə müşayiət olunmur. Bəziləri Yeni il gecəsini depressiv əhval-ruhiyyədə keçirir.
Psixoloq Zəhra Quliyeva Paraqraf.com-a açıqlamasında bildirib ki, Yeni il insanlar üçün adətən yeni başlanğıclar, ümidlər və məqsədlərlə əlaqələndirilir və bu dövrdə ötən ilin xoş və çətin anları tez-tez xatırlanaraq təhlil edilir:
“Lakin bu, hər kəs üçün eyni təsiri yaratmır. İnsanlar emosional vəziyyətlərini fərqli yaşayırlar. Bu isə həm xarakter xüsusiyyətləri, həm emosional durum, həm də maddi vəziyyətlə birbaşa bağlıdır”.
Psixoloq bayramların xoşbəxt qarşılanmamasında iqtisadi amillərin də mühüm rol oynadığını qeyd edib:
“İqtisadi və sosial səbəblər bir-biri ilə sıx bağlıdır. Maddi çətinliklər, ailə xərclərinin artması, maliyyə gözləntilərinin qarşılanmaması, borclar, qeyri-sabit gəlir, işsizlik, yetərsizlik və utanc hissi insanların bayram əhval-ruhiyyəsinə mənfi təsir göstərə bilər”.
Zəhra Quliyeva sosial faktorların da bayram depressiyasını gücləndirdiyini vurğulayıb:
“Sosial səbəblər şən məclislər daha çox paylaşırlar, yalnız olan insanlar depressiv olur, itkilər xatırlanır, sosial təzyiqlər və.s təsir edir. Ən önəmlisi bunu qəbul etmək lazımdır ki, Yeni ili hər bir insan fərqli hisslərlə keçirə bilər. Hərkəs eyni xarakterdə deyil və hərkəs eyni yaşanmışlıqları yaşamır. Buna görə də özünüzü kimlərləsə müqayisə etməyin”.
Kəmalə Vəliyeva
Paraqraf.com
