İsrail Almaniya Federal Parlamentinin (Bundestaq) iki il əvvəl imzalanmış müqavilənin genişləndirilməsi barədə qərarı təsdiqlədiyini açıqlayıb. Söhbət İsrail istehsalı olan “Arrow 3” hava hücumundan müdafiə sistemlərinin əlavə satınalınmasından gedir.
Paraqraf.com xəbər verir ki, bu barədə Almaniya Müdafiə Nazirliyi məlumat yayıb.
Nazirliyin açıqlamasına görə, əlavə müqavilə çərçivəsində Almaniyaya 3,1 milyard dollar dəyərində “Arrow 3” hava hücumundan müdafiə sistemləri satılacaq. Bildirilib ki, yeni razılaşma istehsal sürətinin əhəmiyyətli dərəcədə artırılmasına, həmçinin sistemlərin texniki və əməliyyat imkanlarının daha da təkmilləşdirilməsinə şərait yaradacaq.
Qeyd edək ki, Berlin hökuməti iki il əvvəl İsraillə “Arrow 3” uzun mənzilli raketdən müdafiə sistemlərinin alınması üçün 3,6 milyard dollarlıq müqavilə imzalamışdı. Yeni əlavə razılaşma ilə Almaniyanın İsraildən aldığı bu sistemlərin ümumi dəyəri 6,7 milyard dollara çatacaq.
Kəmalə Vəliyeva
Paraqraf.com
