Naxçıvan Muxtar Respublikası Ali Məclisinin payız sessiyasının növbəti iclası keçirilib. İclasın gündəliyinə “Naxçıvan Muxtar Respublikasının 2026-cı il büdcəsi haqqında” Naxçıvan Muxtar Respublikasının Qanun layihəsinin birinci oxunuşda müzakirəsi daxil edilib.
Paraqraf.com xəbər verir ki, qanun layihəsinin müzakirəsi zamanı Ali Məclis sədrinin birinci müavini Bəxtiyar Məmmədov, İqtisadi siyasət komitəsinin sədri Emin Şıxəliyev və Naxçıvan Muxtar Respublikasının maliyyə naziri Həsən İsmayılov çıxış edərək büdcə layihəsi ilə bağlı fikirlərini və təkliflərini səsləndiriblər.
Azərbaycan Respublikası Hesablama Palatasının auditoru, Hesablama Palatasının Naxçıvan Muxtar Respublikası üzrə İdarəsinin rəisi Hafiz İsmayılbəyli “Naxçıvan Muxtar Respublikasının 2026-cı il büdcəsinin layihəsi” üzrə aparılmış analitik təhlilə dair auditor hesabatını iclas iştirakçılarının diqqətinə çatdırıb. Hesabatda büdcə layihəsinin və ona əlavə edilmiş aidiyyəti məlumatların mövcud qanunvericilik aktlarına uyğunluğu, habelə muxtar respublika büdcəsinin gəlirləri və xərcləri üzrə proqnoz göstəricilərinin düzgünlüyü və tamlığı təhlil edilib, əldə olunan nəticələr əsasında müvafiq tövsiyələr təqdim olunub.
Müzakirələrdən sonra “Naxçıvan Muxtar Respublikasının 2026-cı il büdcəsi haqqında” Naxçıvan Muxtar Respublikası Qanununun layihəsi səsə qoyularaq birinci oxunuşda qəbul edilib.
Həsən
Paraqraf.com
