2024-cü ilin sentyabrında fəaliyyətə başlayan Dərya Group bu qısa müddət ərzində maariflənmə, paylaşım və ilham mənbəyinə çevrilməyi bacarıb. Təşkilatın yaranması təkcə tədbirlər və vebinarlar keçirmək məqsədi daşımırdı. Onun əsas missiyası təhsili yalnız bilik ötürülməsi kimi deyil, həm də dünyagörüş, inam və sevgi formalaşdıran bir proses kimi təqdim etməkdir.
Hər layihə və vebinarda iştirakçılara həm peşəkar bilik, həm də motivasiya vermək əsas prioritetlərdəndir. Çünki mən inanıram ki, doğru yanaşma ilə hər bir insanın həyatına müsbət təsir göstərmək mümkündür. Dərya Group-un artan auditoriyası, genişlənən fəaliyyəti və alınan müsbət rəylər bu işə olan sevginin və səmimiyyətin nəticəsidir.
Təcrübə göstərib ki, səmimiyyət, inam, şəffaflıq və dəyərvermə hər bir uğurun təməlidir. Müəllimlik və rəhbərlik mənim üçün eyni missiyaya – insan yetişdirməyə xidmət edir. Bu missiya isə mənim üçün sadəcə bir iş deyil, ürəkdən sevdiyim bir yoludur.
Fəaliyyətimin mərkəzində isə uşaqlara qarşı həssaslıq dayanır. Onların sağlam prinsiplərlə böyüməsi, gələcəyə inamla addımlaması üçün maarifləndirici layihələrə, valideyn və müəllimlərə dəstək proqramlarına xüsusi önəm verirəm. Çünki hər bir uşaq təkcə ailənin deyil, bütöv cəmiyyətin gələcəyidir.
Hər yeni layihəyə başlayarkən özümə bir sual ünvanlayıram:
“Bu dəfə neçə uşağın həyatına bir damla işıq sala biləcəyəm?”
Məhz bu sual mənim yolumu işıqlandırır, məqsədimin dərinliyini xatırladır və gələcəyə doğru addımlamağım üçün güc verir.
Aytac Məhərrəmova
Dərya Group təsisçi və rəhbəri, ibtidai sinif müəllimi
