Əziz dostlar, CV – işəgötürənin Sizin haqqınızda ilkin təəssürat formalaşdırdığı, həyat yolunuzun və peşəkar təcrübənizin qısa xülasəsini özündə cəmləyən ən vacib sənəddir. İnsan CV vasitəsilə həm öz əməyinin dəyərini qarşı tərəfə ötürür, həm də özünə maraq oyadır. Bu proses müəyyən mənada satış prosesinə bənzəyir: satışda olduğu kimi burada da işəgötürənin ehtiyaclarını, hansı bacarıqlara malik əməkdaş axtardığını düzgün müəyyən etməsək, təqdim etdiyimiz CV işəgötürənin diqqətini çəkməyəcək.
Məhz buna görə də bir çox insanlar “CV göndərdim, amma cavab gəlmədi” deyə şikayət edir. Şübhəsiz, işəgötürən müsbət və ya mənfi geri dönüş etməlidir. Lakin gəlin razılaşaq ki, namizəd üçün əsas məqsəd sadəcə cavab almaq deyil, müsbət cavab almaqdır.
Fikrimcə, aktiv vakansiyaya müraciət etmək istəyən şəxs əvvəlcə həmin müəssisəni və vəzifəni dərindən analiz etməli, daha sonra bu tələblərə uyğun, hədəfli CV hazırlamalıdır. Qısaca desək, bir dəfə hazırladığınız eyni CV-ni bütün vakansiyalara göndərmək doğru yanaşma deyil. Hər müraciətdə həmin vakansiyaya ən uyğun olan bacarıq və təcrübələrinizi ön plana çıxarmaq daha effektiv nəticə verir.
Elvin Abdullayev
Paraqraf.com
