Kilian Mbappe DÇ-2026-nın seçmə mərhələsində Azərbaycana qarşı oyunda iştirak etməməsi səbəbi ilə tənqid olunub.
Paraqraf.com “Mundo Deportivo”ya istinadən xəbər verir ki, Fransa millisinin sabiq yarımmüdafiəçisi Jerom Roten komandanın hücumçusu və kapitanı Kilian Mbappeni Azərbaycana qarşı oyunda topuq zədəsi bəhanəsi ilə iştirak etməmə qərarını pisləyib.
“Biz Ukrayna ilə oyunun 80-ci dəqiqəsində 4:0 hesabı ilə üstün olduğumuz zaman özümüzə sual verirdik, kim Bakıya getməmək üçün zədə uydura bilər?
Mbappe Fransa millisinin kapitanıdır, ona xüsusi yanaşırlar, amma onun komanda yoldaşları da var. Siz həqiqətən düşünürsünüz ki, Bakıya gedənlərin hamısı il ərzində Mbappe qədər və ya daha çox oynayan oyunçular yorulmayıblar və heç nəyi həll etməyən bu oyunda oynamaq istəyirlər? Xeyr. Amma onlar gedirlər, çünki getməlidirlər.
Bu cür qərarlar soyunma otağında problemlərə səbəb ola bilər və mən hələ də əminəm ki, elə oyunçular var ki, Mbappeyə olan bu xoşrəftarlıqdan bezib”, – deyə Roten qeyd edib.
Qeyd edək ki, Azərbaycan millisi DÇ-2026-nın seçmə mərhələsi çərçivəsində sabah Tofiq Bəhramov adına Respublika stadionunda Fransa yığması ilə qarşılaşacaq.
Paraqraf.com
