Son illər Azərbaycanın da daxil olduğu bir çox ölkədə gənclərin miqrasiya meyli getdikcə artır. Xaricə təhsil, iş və ya sadəcə “daha yaxşı həyat” axtarışı ilə üz tutan gənclər, əslində, bir cəmiyyətin gələcəyini də özü ilə aparır. Bu proses – sadəcə fərdi qərar deyil, milli miqyasda “beyin axını” probleminin yaranmasıdır.
Gənclər niyə gedir? Çünki onlar dəyər verildiyi, səsini eşitdirə bildiyi, əməyinə layiqli qarşılıq aldığı bir mühit arzulayır. Bəziləri elmi, bəziləri yaradıcılığı, bəziləri isə sadəcə azadlığı üçün gedir. Amma əsl məsələ ondadır ki, onların çoxu getmək istəmir — sadəcə qalmaq üçün səbəb tapa bilmir.
Beyin axını təkcə “bilik itkisi” deyil; bu, həm də enerji, ideya və gələcək potensialın itkisi deməkdir. Bir gəncin yetişməsi illərin zəhməti, ailənin və dövlətin sərmayəsidir. Onun başqa ölkədə çiçəklənməsi, amma doğma vətəndə qarşılıq tapmaması, hər bir millət üçün ciddi xəbərdarlıqdır.
Amma bu prosesin qarşısını almaq mümkündür. Bunun üçün gənclərə sadəcə “vətəni sevin” demək yetmir – onlara seviləcək bir vətən təqdim etmək lazımdır. Ədalətli iş mühiti, şəffaf sistem, yaradıcılığa və elmə dəstək – beyin axınını dayandıran əsas amillərdir.
Gənclər bir xalqın gələcəyidir, amma o gələcəyin burada qalması üçün
onlara ümid, imkan və inam lazımdır.
M. Mehdiyeva
Paraqraf.com
