Ermənistan Milli Təhlükəsizlik Xidməti Eçmiədzindəki “kimyaçılar” hərbi hissəsində əməliyyat keçirib.
Bu barədə “Hraparak” qəzeti məlumat yaylb. Nəşrin məlumatına görə, MTX əməkdaşları dünən gecədən bəri bölmənin ərazisindədirlər. Yüksək rütbəli hərbçilər də daxil olmaqla bir neçə nəfərin saxlanıldığı xəbər verilir. Əvvəllər bu hissə ilə bağlı cinayət işi geniş ictimaiyyətin diqqətini cəlb edib.
Bu, Ermənistan Silahlı Qüvvələrinin Baş Qərargah rəisinin keçmiş müavini general-leytenant Andranik Makaryan və bir sıra digər hərbçiləri əhatə edir. İstintaq təsdiq edir ki, Makaryan 2020-ci ilin oktyabr ayında Zəngilan rayonu ərazisində hərbi əməliyyatlara rəhbərlik edib. Daha sonra onun komandanlığı altında olan “kimyaçılar” hərbi hissəsinin 62 hərbçisindən ibarət bölmə mühasirəyə alınıb və Azərbaycan ordusu ilə qeyri-bərabər döyüşə girib.
Mövqelər möhkəmlənmədiyindən qrup demək olar ki, tamamilə məhv edilib. 12 nəfər ölüb, 5 nəfər əsir düşüb, 24 nəfərin taleyi isə məlum deyil. İttiham aktı ilə birlikdə iş artıq məhkəməyə göndərilib. Qeyd edilən məlumatdan Ermənistan MTX-nin keçirdiyi əməliyyatın Andranik Markaryanı 44 günlük müharibədə tabeliyində olan hərbi birləşmənin məhv olması ilə nəticələnmiş vəzifə səhlənkarlığı ittihamı üzrə həbsi məqsədilə keçirildiyi təəssüratı yaranır.
Təbii ki, əsas məqsədlərdən biri Andranik Markaryanı cinayət məsuliyyətinə cəlb etmək olub. Lakin aparılan həbslərin səbəbinin gizli saxlanılması əməliyyatın başqa planın tərkib hissəsi olduğunu deməyə əsas verir. Bu baxımdan, əməliyyatın Eçmiədzində aparılması xüsusilə diqqəti cəlb edir.
Hazırda Nikol Paşinyan hakimiyyətinin əsas hədəfinin Erməni Apostol Kilsəsini və katolikos II Qaregini neytrallaşdırmaq olduğunu nəzərə alsaq, yüksək rütbəli zabitlərin həbsinin də bu “Eçmiədzin işi”nin tərkib hissəsi olduğu ehtimalı yüksəkdir. Artıq bir qrup arxiyepiskop və ruhani terrorçuluqda, həmçinin silahlı yolla dövlət çevrilişinə cəhddə ittiham edilərək həbs olunub. Son günlər isə Ermənistanda həbslərin sayı artmaqdadır.
Gümrü şəhərinin meri Vardan Qukasyanın, Masis (Uluxanlı) şəhərinin meri David Hambartsumyanın həbslərinin ardınca hərbi hissədə zabitlərin saxlanılması bu əməliyyatların eyni prosesin tərkib hissəsi olduğunu göstərir. Gümrüdə daha 4 nəfər saxlanılıb və bununla Vardan Qukasyan işi üzrə barəsində ittiham elan olunanların sayı 13 nəfərə çatıb.
Ermənistanın sabiq prezidenti Serj Sarksiyan da 2005-ci ildə Müdafiə Nazirliyinin balansında olan torpaq sahələrinin qanunsuz satılması ittihamı üzrə məhkəməyə cəlb edilib. Bütün bu proseslərə nəzər saldıqda, həbs edilmiş siyasətçilərin, din xadimlərinin və hərbçilərin hamısının Rusiyaya bağlı şəxslər olduğunu görmək olar.
Yəni Nikol Paşinyan 2026-cı ildə Ermənistanda keçiriləcək seçkilər yaxınlaşdıqca Rusiyaya bağlı “5-ci kolon”u ləğv etmək üçün hücuma keçib. Çünki Rusiya növbəti parlament seçkilərinə Paşinyanı devirmək üçün siyasi fürsət kimi baxır.
Bu baxımdan, Rusiyanın ən böyük dayaqlarından biri ordunun tərkibindədir. Kreml Paşinyanı kənarlaşdırmaq üçün yalnız siyasi deyil, həm də hərbi resurslardan da istifadə edə bilər. Əks təqdirdə, Rusiyanın Ermənistanda və Cənubi Qafqazda geosiyasi mövqeləri bir qədər də zəifləyəcək.
Yəni Rusiya Ermənistandakı seçkilərə geosiyasi proseslərin tərkib hissəsi kimi baxır. Bu kontekstdə Azərbaycanda da Rusiyaya bağlı “5-ci kolon”un dövlət çevrilişi etmək cəhdləri bütün proseslərin eyni mərkəzdən idarə olunduğunu göstərir.
Moskva Cənubi Qafqazı özünün geosiyasi orbitinə qaytarmaq üçün Azərbaycanda və Ermənistandakı “5-ci kolon”un hakimiyyət hərisliyindən istifadə etməyə çalışır. Bu gün Ramiz Mehdiyevin Kremlə ünvanladığı vətənə xəyanət məktubu ilə baş nazir olmaq müqabilində Ermənistanı Rusiya-Belarus İttifaq Dövlətinə daxil etməyi təklif edən kommunist Vardan Qukasyanın yanaşması arasında heç bir fərq yoxdur.
Hər ikisi siyasi təfəkkürünə görə bolşevikdir, Rusiya imperiyasının sadiq nökərləridir. Azərbaycanda və Ermənistanda hakimiyyət üçün siyasi “bazarlığ”a cana atan qrupların fəallaşması müşahidə olunur.
Ramiz Mehdiyev Rusiyanın imperiya maraqlarını təmin etmək xatirinə Azərbaycanın milli dövlətçilik mənafelərini qurban verməyə hazır görünür. Lakin aparılan həbslər və ifşa edilən faktlar Azərbaycan dövlətinin təməl prinsiplərinin artıq çox gücləndiyini, onu sarsıtmağın mümkün olmadığını təsdiq edir.
