Bu gün İsveçin paytaxtı Stokholm şəhərində “Arena Satelliten” Mədəniyyət və İdman Mərkəzinin zalında “Əlilliyi olan qaçqın qadınların həyat hekayələri” adlı videoçarxın təqdimatı keçirilib.
Paraqraf.com “Bugun.tv” yə istinadən xəbər verir ki,videoçarx Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi və “Əlil Qadınlar Cəmiyyəti” İctimai Birliyinin təşəbbüsü ilə hazırlanıb. Videoçarxın ssenari müəllifi Azərbaycan Televiziyası və Radio Verilişləri QSC-nin İctimai-siyasi proqramlar studiyasının Tarix şöbəsinin müdiri, tarix üzrə fəlsəfə doktoru Mahir Qəribov, rejissor və operator Rahim Sadiqbəylidir.
Azərbaycan Respublikasının Diasporla İş üzrə Dövlət Komitəsi, Beynəlxalq Media Qrupu (International Media Group) və Norveçdə fəaliyyət göstərən “Azərbaycan Evi”nin təşkilati dəstəyi ilə keçirilən tədbir Azərbaycan və İsveç dövlət himnlərinin səslənməsi ilə başlayıb.
İsveçdə akkreditə olunmuş diplomatik korpusun üzvləri, İsveç, Çin, Özbəkistan, Türkiyə və Azərbaycan icmalarının nümayəndələrinin iştirakı ilə keçirilən tədbir şəhidlərimizin ruhunun bir dəqiqəlik sükutla yad edilməsi ilə davam edib.
Açılış nitqi ilə çıxış edən Diasporla İş üzrə Dövlət Komitəsinin Koordinasiya Şurasının İsveç üzrə nümayəndəsi Ayda Əmir Haşimi qeyd edib ki, bu tədbir doğma torpaqlarından didərgin düşmüş insanların taleyinə, qayıdış arzusuna və milli yaddaşına hörmətin təcəssümüdür.
“Qərbi Azərbaycana qayıdış” tarixi ədalətin bərpası və azərbaycanlıların öz ata-baba torpaqlarına sülh yolu ilə dönməsi ideyasıdır. Biz Vətənimizin bütövlüyü uğrunda canını fəda etmiş bütün şəhidlərimizin əziz xatirəsini dərin ehtiramla yad edirik, qazilərimizə şəfa diləyirik. Azərbaycanımızın bütövlüyünü, güclənməsini və çiçəklənməsini təmin edən Prezident İlham Əliyevə böyük sevgimizi dilə gətiririk”, – deyə A.Ə. Haşimi vurğulayıb.
Ardınca söz “Əlil Qadınlar Cəmiyyəti” İctimai Birliyinin sədri Məhluqə Rəhimovaya verilib. O qeyd edib ki, cəmiyyət olaraq dünyanın bir çox konfranslarında fəal şəkildə iştirak edirlər.
“Məqsədimiz Azərbaycan həqiqətlərini dünyaya çatdırmaqdır. Prezident İlham Əliyevin sülh siyasəti nəticəsində biz öz Vətənimizə qayıdacağıq, buna ürəkdən inanırıq. Hamımız öz sahəmizdə çalışaraq müharibəsiz bir dünya qurmağa töhfə verməliyik”, – deyə Məhluqə Rəhimova vurğulayıb.
Səfirliyin birinci katibi Əsgər Nağıyev bildirib ki, təqdim olunan videoçarx təkcə fərdi taleləri deyil, həm də cəmiyyətimizin humanist dəyərlərini, həmrəylik ruhunu və sosial ədalətə bağlılığını əks etdirir.
Tədbir Beynəlxalq Media Qrupunun sədri, videoçarxın prodüseri və rejissoru Rəhim Sadıqbəylinin çıxışı ilə davam edib.
“Bu gün burada beynəlxalq auditoriyaya bu cür mühüm bir videoçarxı təqdim etmək qürurvericidir”, – deyə o bildirib.
Çıxışlardan sonra “Əlilliyi olan qaçqın qadınların həyat hekayələri” adlı videoçarx ingilis və Azərbaycan dillərində tamaşaçılara təqdim olunub.
Videoçarxın layihə rəhbəri Məhluqə Rəhimova, layihə rəhbərinin köməkçisi Firuzə Babayeva, ssenari müəllifi Tarix üzrə Fəlsəfə doktoru, Azərbaycan Televiziyası və Radio Verlişləri QSC-nin İctimai-siyasi proqramlar studiyasının Tarix şöbəsinin müdiri Mahir Qəribov, layihə üzrə ekspert isə Səidə Qurbanovadır.
Tədbirin sonunda “Əlil Qadınlar Cəmiyyəti”nin Bəyanatı səsləndirilib.
“Biz, Azərbaycan “Əlil Qadınlar Cəmiyyəti’ olaraq, əlilliyi olan qadınların və uşaqların çoxqat həssaslığını önə çəkir və heç kimin unudulmaması ideyasını müdafiə edirik. Biz nifrət deyil – ümid, qisas deyil – anlayış, unudulmaq deyil – xatırlanmaq istəyirik.
Bizim bəyanatımız yalvarış deyil, bu, insan ləyaqətini qorumaq, regionda və dünyada sülhü bərqərar etmək, həmçinin qaçqınlarımızın evlərinə təhlükəsiz dönüş yolunu açmaq üçün birgə hərəkətə keçmək çağırışıdır”, – bəyanatda qeyd olunub.
Tədbirdə iştirakçılara Azərbaycan mədəniyyətinin kulinariya ənənələrini əks etdirən milli şirniyyatlar və isti içkilər təqdim olunub.
Paraqraf.com
