“Nə qədər ki, Vaşinqton məntiqsiz tələblər irəli sürür, İran ABŞ ilə danışıqlara qayıtmayacaq”.
Bu barədə İranın xarici işlər naziri Abbas Araqçi danışıb.
Qeyd edək ki, bu günə qədər Tehran və Vaşinqtonun iştirakı ilə 5 raunddan ibarət nüvə danışıqları baş tutub. Danışıqlar iyun ayında İsrail və İran arasında 12 gün davam edən münaqişənin başlamasından sonra dayandırılıb. ABŞ sözügedən münaqişənin gərginləşməsindən 9 gün sonra İranın Fordo, Natanz və İsfahandakı nüvə obyektlərinə zərbələr endirib.
Mövzu ilə bağlı politoloq Zeynal Əmrəliyev “Paraqraf.com”a açıqlamasında bildirib ki, İranın xarici işlər naziri Abbas Araqçinin verdiyi açıqlama onu göstərir ki, İran tərəfi ABŞ-lə danışıqlarda çox da maraqlı deyil:
“Çünki ABŞ-nin təklif etdiyi şərtlər İranın maraqlarına cavab vermir. Yəni ABŞ İranın uranın zənginləşdirməsi prosesini dayandırmağı tələb edir. Lakin rəsmi Tehran bununla razılaşmır. ABŞ hələ də sülh üçün qapıları bağlamayacaq. Yəni İrana müəyyən şərtlər təqdim edəcək. Çünki ABŞ-nin vitse-prezidenti İsrailə səfəri zamanı səsləndirdiyi fikirlər də göstərir ki, İrana qarşı yenidən müəyyən addımlar atıla bilər. Yəni hərbi əməliyyatların keçiriləcəyi ilə bağlı suala Vens dəqiq cavab vermədi. Bu, onu göstərir ki, ABŞ hələ ki dioloq üçün qapıları bağlamır”.
Politoloqun sözlərinə görə, ABŞ İrana qarşı müəyyən təzyiq vasitələrindən istifadə edə bilər:
“Lakin indiki mərhələdə hərbi əməliyyatların bərpa olunması bir qədər istisna edilən variantdır. Çünki Amerikanın əsas niyyəti Yaxın Şərqdə-Qəzza bölgəsində sülhü təmin etməkdir. Yəni burada Tramp öz planını həyata keçirməyə çalışır”.
Politoloq əlavə edib ki, ilk növbədə İrandan əvvəl İranın proski qüvvələrini HƏMAS, Hizbullah və Husilərə qarşı əməliyyatı olacaq:
“Əgər növbəti müharibə baş verərsə, bu 3 təşkilat İsrailə qarşı əməliyyat həyata keçirə bilər. Buna gördə də bunlar zərəsizləşdikdə İrana qarşı hərbi kompaniyalar yenindən gündəmə gələ bilər”.
Kəmalə Vəliyeva
Paraqraf.com
