Rusiya və ABŞ arasında siyasi gərginliklər fonunda baş tutan istənilən yüksək səviyyəli əlaqə beynəlxalq gündəmdə diqqətlə izlənir. Bu baxımdan, Rusiya xarici işlər naziri Sergey Lavrov ilə ABŞ dövlət katibi Marko Rubio arasında baş tutan son telefon danışığı da diqqət mərkəzindədir. Söz mövzusu təmas yalnız ikitərəfli münasibətləri deyil, həm də qlobal sabitliyə təsir edən aktual mövzuları əhatə edir.
Mövzu ilə bağlı politoloq Aytən Qurbanova “Paraqraf.com”-a açıqlamasında bildirib ki, telefon danışığının əsas müzakirə mövzusu Rusiya-Ukrayna müharibəsi olub:
“Bu istiqamətdə aparılan müzakirələr telefon danışığının əsas məğzini təşkil edən məsələ kimi önə çıxıb. Digər tərəfdən, Lavrov və Rubio arasında mümkün bir görüşün keçirilməsi ilə bağlı yayılan məlumatlar onu deməyə əsas verir ki, bu, iki rəsmi arasında dialoqun əsas predmetlərindən biridir”.
Politoloqun sözlərinə görə, ABŞ-nin prezidenti Donald Tramp ilə Rusiya prezidenti Vladimir Putin arasında Macarıstanda keçirilməsi gözlənilən görüş, Lavrov və Rubio arasında aparılan telefon danışığının daha bir önəmli müzakirə mövzusu olub:
“Bu kontekstdə görüşün texniki detalları, mümkün təxirə salınma səbəbləri və digər məqamlar müzakirə edilib. Həmçinin, Rusiya-Ukrayna müharibəsinə dair gələcək danışıqların formatı və mümkün təşəbbüslər də telefon danışığında gündəmə gətirilib. Bu, onu göstərir ki, ABŞ və Rusiya rəsmiləri birbaşa kommunikasiya kanallarını açıq saxlamaq və danışıqlar prosesini bərpa etmək niyyətindədirlər”.
Aytən Qurbanova hesab edir ki, bu cür intensiv təmaslara baxmayaraq, Rusiya-Ukrayna müharibəsi ilə bağlı yaxın müddətdə real nəticələr əldə olunması hələlik çətin görünür:
“Ukraynanın taleyi və ərazi bütövlüyü məsələsində ciddi dönüşlərin olması indiki mərhələdə real deyil. Tərəflər arasında prinsipial ziddiyyətlər qalmaqdadır və bu səbəbdən konkret nəticə əldə olunması ehtimalı aşağıdır”.
Kəmalə Vəliyeva
Paraqraf.com
