Rusiya əməliyyat həcminə görə Avropanın ən böyük kriptovalyuta bazarına çevrilib.
Paraqraf.com xəbər verir ki, kriptovalyutalar üzrə analiz şirkəti “Chainalysis” yeni hesabatını yayımlayıb.
Bildirilib ki, 2023-cü ilin iyul ayından etibarən ölkədə həyata keçirilən kriptovalyuta əməliyyatlarının ümumi həcmi 376 milyard ABŞ dollarına çatıb. Eyni dövrdə Böyük Britaniyada bu rəqəm 273 milyard dollar olaraq qeydə alınıb.
Mütəxəssislərə görə, bu mənzərə Rusiyada kriptovalyutaların artıq yalnız spekulyativ bir sərmayə deyil, həm də iş dünyasında və fərdi istifadəçilər arasında aktiv bir ödəniş vasitəsinə çevrildiyini göstərir.
“BFM TV”-yə danışan Tsifra Marketsin baş analitiki Aleksandr Krayko bildirib ki, kripto aktivlərin ticarət yönümlü dövrü artıq geridə qalıb və hazırda əməliyyatların əsas hissəsi transsərhəd köçürmələrdən ibarətdir.
Krayko hesab edir ki, Rusiya xüsusilə Asiya və Orta Şərq ölkələri ilə kripto əsaslı ticarət əməliyyatlarında regional maliyyə mərkəzinə çevrilə bilər. Bu tendensiya bazarın yetkinləşdiyini və qəbul səviyyəsinin artdığını göstərir.
“Astero Falcon” portfel meneceri Alena Nikolayeva isə Rusiyanın Avropa kripto bazarında zirvəyə qalxmasının səbəblərinin mürəkkəb olduğunu vurğulayıb.
Onun fikrincə, Qərb sanksiyaları ölkəni öz kripto infrastrukturunu inkişaf etdirməyə vadar edib. Böyük miqyaslı əməliyyatların həcmi 86 % artıb, rubla indeksli A7A5 adlı stabilcoin isə transsərhəd ödənişlərdə əsas vasitəyə çevrilib. Şirkətlər bu yolla dollar və avro üzərindəki məhdudiyyətləri aşa biliblər.
Mütəxəssislər Rusiyada təxminən 9 milyon insanın aktiv şəkildə kriptovalyuta saxladığını, 20 milyon insanın isə həyatında ən az bir dəfə kripto istifadə etdiyini təxmin edirlər.
Gənc nəsil üçün kriptovalyuta artıq yalnız sərmayə deyil, həm də yığım və beynəlxalq ödəniş vasitəsi kimi qəbul edilir.
“Financial Times”-ın məlumatına görə, yalnız bu ilin ilk dörd ayında rublla dəstəklənən A7A5 stabilcoin üzərindən 9,5 milyard dollar həcmində əməliyyat həyata keçirilib.
