“Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyi ikinci forumdan keçən dövr ərzində QHT-lərin dəstəyi ilə 19 dövlət proqramı üzrə 67 tapşırığın icrasını 97 faiz nəticə ilə yekunlaşdırıb”.
Paraqraf.com xəbər verir ki, bunu Xankəndi şəhərində keçirilən Azərbaycan Qeyri-Hökumət Təşkilatlarının Əməkdaşlıq Forumunda Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva deyib.
Aygün Əliyeva bildirib ki, Qlobal Cənub QHT Platformasının yaradılması Azərbaycan QHT-lərinin beynəlxalq etimad qazanmasında dönüş nöqtəsi olub. Bu təşəbbüsə 116 ölkədən 120 nümayəndə şəxsən, 137 ölkədən isə 1023 nümayəndə imza ilə dəstək verib.
Bundan başqa, Agentlik dövlət–özəl–QHT əməkdaşlığının ilk nümunələrini yaradıb. Ekologiya və Təbii Sərvətlər Nazirliyi, Qarabağ Dirçəliş Fondu və bp ilə uğurlu əməkdaşlıq həyata keçirilib.
İcraçı direktor qeyd edib ki, QHT-lərin inkişaf və mübadilə proqramları uğurla davam edir. 6-cı inkişaf və mübadilə proqramı oktyabrın 18-19-da Şuşada uğurla yekunlaşıb.
Qərbi Azərbaycanlıların Qayıdış Konsepsiyasından irəli gələn təşəbbüslərə dəstək məqsədilə bu günədək 100-dən çox layihə maliyyələşdirilib. 2026-cı il qrant müsabiqələrində də Prezidentin tövsiyəsinə uyğun olaraq bu istiqamətə xüsusi önəm veriləcək.
“İctimai diplomatiya və QHT-lərin beynəlxalq fəaliyyətləri artıq öz effektini göstərir. Bu, Azərbaycanın Zəfər dövründə QHT-lər vasitəsilə beynəlxalq tribunada layiqli təmsilçiliyini təmin edən mühüm amil kimi çıxış edir”, – deyə Aygün Əliyeva bildirib.
Paraqraf.com
