Paraqraf.com xəbər verir ki, bunu keçmiş millət vəkili, tanınmış təhsil eksperti Etibar Əliyev “Facebook” hesabında Azərbaycan Milli Elmlər Akademiyasının müxbir üzvü Musa Qasımlının 2018-ci ildə Ramiz Mehdiyevin biblioqrafiyasında dərc olunmuş məqaləsinə sərt və açıq tənqid edib.
Söhbət “Azərbaycanın görkəmli şəxsiyyətləri” seriyasından nəşr olunan və Ramiz Mehdiyevə həsr olunmuş biblioqrafiyanın 102-ci səhifəsində yer alan yazıdan gedir. Musa Qasımlı həmin yazıda Ramiz Mehdiyevi “istiqlal ideyasının qoruyucusu”, “xalqına qəlbən bağlı dövlət adamı”, “Azərbaycan fəlsəfi fikrinin ən görkəmli nümayəndəsi” və “müstəqil dövlət quruculuğunun əsas simalarından biri” kimi təqdim edir.
Lakin Etibar Əliyev bu tərifləri sərt şəkildə tənqid edərək bildirib:
“Hörmətli Musa Qasımlının Ramiz Mehdiyev haqqında yazdığı məqalənin birinci sözündən sonuncu sözünə qədər hamısı yalandır. AMEA-nın müxbir üzvünə belə saxta tərif uydurmağı yaraşdırmadım”.
Bu fikirlər sosial mediada ciddi rezonans doğurub. Əliyevin bu cəsarətli və sərt çıxışı, dövlət strukturlarında uzun illər yüksək vəzifələr tutmuş Ramiz Mehdiyevin fəaliyyəti ilə bağlı illərdir ictimaiyyətdə dolaşan sualları və narazılıqları bir daha gündəmə gətirib.
Xatırladaq ki, Ramiz Mehdiyev uzun illər Prezident Administrasiyasında rəhbər vəzifə tutmuş, daha sonra isə AMEA-nın prezidenti olmuşdu. Onun fəaliyyəti dövründə bir sıra qalmaqallı qərarlar və kadr dəyişiklikləri ilə bağlı da müzakirələr baş vermişdi.
Etibar Əliyevin bu açıqlaması, xüsusilə akademik çevrələrdə və ictimai dairələrdə “yaltaqlıq” və “saxta təriflər” mövzusunda müzakirələri daha da alovlandırıb.
Həsən
Paraqraf.com
