ABŞ Prezidenti Donald Trampın keçmiş milli təhlükəsizlik müşaviri Con Boltona qarşı 18 maddəlik ittiham aktı hazırlanıb.
Paraqraf.com xəbər verir ki, bu barədə CNN adının açıqlanmasını istəməyən iki rəsmi mənbəyə istinadən məlumat yayıb.
Bildirilib ki, Federal Təhqiqatlar Bürosu (FTB) tərəfindən evində axtarış aparılmış Bolton məxfi məlumatları qanunsuz saxlamaq və paylaşmaqda ittiham olunur.
Məlumata əsasən, C.Boltonun yaxın günlərdə Merilend ştatının Qrinbelt şəhərində yerləşən federal məhkəməyə təslim olacağı gözlənilir.
İstintaq sənədlərində qeyd olunur ki, Bolton vəzifədə olduğu dövrdə həyat yoldaşı və qızı ilə məxfi məlumatları e-poçt vasitəsilə paylaşıb. Onun bu hərəkətləri ABŞ qanunvericiliyinə əsasən, ciddi cinayət kimi qiymətləndirilir.
Qeyd edək ki, Con Bolton 2018-2019-cu illərdə Ağ Evdə milli təhlükəsizlik müşaviri vəzifəsində çalışıb. O, Tramp Administrasiyasının “İrana maksimum təzyiq” siyasətinin əsas memarlarından biri kimi tanınıb. Sonradan Trampın bəzi qərarları ilə razılaşmadığı üçün vəzifədən uzaqlaşdırılıb.
Paraqraf.com
