Bazarlarda bəzi satıcılar tərəzidə çəkini bilərəkdən az göstərir. Qeyri-qida məhsullarında isə qiymət eyni qalır, lakin məhsulun çəkisi azaldılır. Beləcə, alıcıların xəbəri olmadan “çəki oyunu” oynanılır.
Satıcıların bir çoxunun vergi ödəyicisi (VÖEN) yoxdur. Onlar sadəcə bazarda gündəlik icarə ilə rəf götürərək fəaliyyət göstərir, nəticədə nəzarətsiz mühitdə alıcıları aldatmaq daha asan olur. Bəzi hallarda isə keyfiyyətsiz mallar satılaraq istehlakçı hüquqları kobud şəkildə pozulur.
Mövzu ilə bağlı Azad İstehlakçılar İctimai Birliyinin sədri Eyyub Hüseynov Paraqraf.com-a açıqlamasında bildirib ki, Azərbaycan Qida Təhlükəsizliyi Agentliyinin (AQTA) bazarlara nəzarəti çox zəifdir:
“Bazarlarda kisələrdə satılan müxtəlif çərəzlərin üzərində istehsal tarixi göstərilmir. Tərəzilərin yoxlanması isə, təəssüf ki, könüllü xarakter daşıyır. Halbuki bu cihazlar hər il standart qaydada yoxlanılmalı, möhür vurulmalıdır. Amma bu, yalnız bazar rəhbərliyinin təşəbbüsü ilə baş verir”.
Eyyub Hüseynov əlavə edib ki, Nazirlər Kabinetinin 94 saylı qərarına əsasən bazarlarda mütləq nəzarət tərəziləri quraşdırılmalıdır:
“İstehlakçılar aldıqları məhsulu həmin tərəzilərdə çəkərək düzgünlüyü yoxlaya bilərlər. Təəssüf ki, bazarlar həm çəki, həm də keyfiyyət baxımından alıcıların ən çox aldandığı məkanlara çevrilib. Azərbaycanın fəxri olan gözəl bazarlarda belə halların baş verməsi yolverilməzdir. AQTA-nın bu məkanlarda daimi açıq nümayəndəliyi olmalıdır”.
Kəmalə Vəliyeva
Paraqraf.com
